ШӨХТГ-аас зургаадугаар сарын 17-ны өдрийн тушаалаар иргэдээс ирсэн гомдлын дагуу нийслэлийн хэмжээнд үйл ажиллагаа явуулдаг таван авто үйлчилгээний газруудад шалгалт хийжээ. Энэ талаар мэдээлэл хийлээ. Шалгалтад хамрагдсан таван байгууллага зөвшөөрөлгүй, үнэ тарифыг ил тавьдаггүй, автомашиныг хүлээн авсан талаар тэмдэглэл хөтөлдөггүй, ажлын байрны нөхцөл бүрдээгүй, хөдөлмөр хамгааллын аюулгүй байдлыг хангаагүй газарт үйл ажиллагаа явуулж байжээ.

Хэрэглэгчийн эрхийг хамгаалах газрын дарга Ш.Цэрэндулам: “Гаалийн байгууллагаас авсан мэдээллээр сүүлийн жилүүдэд эвдрэлтэй автомашин гаалиар орж ирж байгаа тоо хэмжээ нэмэгдсэн байна. Уг автомашины аль засварын газар хэрхэн засварлаж, хэнд борлуулж буй талаар бүртгэл мэдээлэл хяналт алга. Үйлчилгээ үзүүлж буй байгууллагуудын хувьд баталгааны асуудал маш чухал байдаг. Гэтэл авто засварын газрууд зардлын баримт өгөөд түүнийгээ баталгааны хуудас хэмээн иргэдийг төөрөгдүүлдэг байна. Иймд авто үйлчилгээний байгууллагын хариуцлагыг нэмэгдүүлэх нэн шаардлагатай нөхцөл байдал үүсээд байгаа” гэв.

Улсын хэмжээнд 2000 гаруй авто засварын үйлчилгээ эрхэлдэг аж ахуй нэгж байдаг гэх албан бус мэдээ бий. Гэтэл НМХГ-аас 2014 оноос хойш эдгээр засварын газарт оогт шалгалт хийгээгүй. Мөн 2018 оноос Авто үйлчилгээний санг ажиллуулахаар эхлүүлсэн ч өнөөдрийг хүртэл ажил хэрэг болгоогүй, хичнээн авто засвар, үйлчилгээний газар байгаа талаар нэгдсэн мэдээлэлгүй байгаа тул яаралтай ажилд оруулах шаардлагатай байгааг ШӨХТГ-аас мэдэгдэв. Улаанбаатар хотод 2324 авто үйлчилгээний газар үйл ажиллагаа явуулдаг гэсэн мэдээлэл байгаа боловч яг үнэн хэрэгтээ хэд байгааг мэдэх боломжгүй аж.