Олимпийн хоёр удаагийн медальт Каори Мацүмото жүдог орхиж буйгаа мэдэгдлээ. Тэрээр шинэ карьеараа мөхөөлдөсний дэлгүүрээр эхлүүлнэ гэв.

Гурав дахь олимпийн наадамдаа хүссэн үр дүндээ хүрч чадаагүйгээс жүдог орхихоор шийдсэн тэрээр Токиогийн коллежийн дүүрэгт мөхөөлдөсний дэлгүүрээ нээх гэнэ.

“Мөхөөлдөс хийх нь миний амьдралын номын нэг том бүлэг болно. Би дэлгүүр нээх бэлтгэлээ бүрэн хангасан учир хүн бүр ирж манайхаар үйлчлүүлээсэй гэж хүсэж байна.” хэмээн жүдогийн спортоо орхихоо зарласан хэвлэлийн хурлын үеэр мэдэгджээ.

Мацүмото 2012 оны Лондонгийн олимпоос алтан медаль хүртсэний дараа гоё амттай мөхөөлдөс идмээр санагдаж байснаа дурсаж “Би нэг өдөрт дөрвөн мөхөөлдөс идсэн. Дараа нь бие өвдсөн. Тэр үед би эрүүл мэндэд сайн, жингээ барьж буй тамирчид ч өдөр бүр амтархан хүртэж болох мөхөөлдөс хийхийг мөрөөдөж эхэлсэн.” гэжээ.

Мөн “Жүдогийн спортоор дамжуулж би хүмүүст инээмсэглэл бэлэглэж байсан бол одоо амтат мөхөөлдсөөр дамжуулан баяр баясал түгээнэ” гэжээ.

2017 онд үрийн зулай үнэрлэсэн тэрээр спортын ертөнцөө орхиж сайн ээж болж, мөхөөлдөсний дэлгүүрээ ажиллуулан энгийн тайван амьдрах замыг сонгосон нь шүтэн бишрэгчдийг нь гайхашруулсан аж.

Эх сурвалж: japantimes.co.jp