Монголын рок, поп хөгжмийн ертөнцийн амьд домог “Харанга” хамтлагийн 30 жилийн ой энэ онд тохиож байгаа. Ардчиллаас ах эл түүхэн ойг тохиолдуулан “Харанга 30 жил-Замд гаръя…” тоглолтоо аравдугаар сарын 19-ний өдрийн 19 цагт Буянт-Ухаа спорт цогцолборт хийх болсон тухай өнөөдөр /2019.09.23/ хэвлэлийн бага хурал хийлээ. Хэвлэлийн хуралд “Харанга” хамтлагийн ахлагч, МУГЖ Ц.Энхманлай, МУУГЗ Ц.Чулуунбат /гитарчин, дуучин/, МУГЖ Х.Лхагвасүрэн /гоцлол дуучин/, МУСТА Я.Одсүрэн /хэмнэлт гитарчин/, МУСТА Н.Пүрэвдаш /бөмбөрчин, цохилуур хөгжимчин/ нар оролцлоо. Хэвлэлийн бага хурлын эхэнд “Харанга” хамтлагийн ахлагч, МУГЖ Ц.Энхманлай: “Ардчиллын салхи сэвэлзэж байсан тэртээх 1989 оноос хойш 30 жил өнгөрчээ. Бидний 30 жилийн ой бол дан ганц “Харанга”-ын баяр бус, “Харанга”-ыг сонсдог сонсогчдын ч бас баяр. Анхныхаа бүрэлдэхүүнээр 30 жил оршин тогтносон хамтлаг дэлхий дахинд гарын таван хуруунд багтана. Манай 30 жилийн ойн тоглолтод маш олон байгууллага идэвх зүтгэлтэй дэмжин оролцож байгаад баярлаж талархсанаа илэрхийлье” гэсэн юм.

“Харанга” хамтлагийн дуучин, МУУГЗ Ц.Чулуунбат: “Монголыг нэг гэр бүл гэж авч үзвэл гурван үеэрээ “Харанга”-ыг сонсдог гэх мэдээлэл байдаг. Бид үүнийг мэдэрдэг. Энэ баяр бол бид бүгдийн нийт монголчуудын баяр учраас баяраа хамтдаа тэмдэглэнэ. Ойн тоглолтоо “Буянт-Ухаа” цогцолборт ганцхан удаа хийнэ. Харангын ямар дууг хэн яаж дуулах нь нууц хэвээрээ үлдэг. “Харанга”-ын фен клубийн гишүүдийн саналд үндэслэн, тоглолтын хөтөлбөрөө боловсруулсан. Тоглолтод зориулан хотын төвөөс “Харанга”-ын логотой 10 том оврын автобусыг хотын төвөөс “Буянт-Ухаа” цогцолбор руу өдрийн 12.00-24:00 цагийн хооронд явуулна. “Харанга”-ын тоглолтын тасалбартай хэн бүхэн тэр автобусаар үнэгүй үйлчлүүлэх боломжтой” гэв.

Тоглолтын үеэр хамтлагийн түүхийг өгүүлэх зургийн үзэсгэлэн гаргах аж. Энэ талаар Соёлын Гавьяат Зүтгэлтэн С.Цогтбаяр: “Харанга” бол амьд домог. Нийгмээ өөрчлөх ардчиллын салхи сэвэлзэхэд, нийгмийн оюун санааны өөрчлөлтөд “Харанга” томоохон үүрэг гүйцэтгэсэн. “Харанга”-ын дууны өнгө, ая, хэмнэл үнэхээр том нөлөө үзүүлсэн. Армийн үлгэр жишээ үлээвэр найрал хөгжмийн дэргэд “Соёмбо” хамтлаг 1978 онд байгуулагдсан. Энэ хамтлаг нь “Харанга”-ын суурь болсон юм. “Харанга” хамтлаг анхны гэсэн тодотголтой олон амжилтыг эзэмшдэг. Дэлхийн стандартад нийцсэн анхны цомог, анхны видео клипийг “Харанга” л хийж байлаа. Ард түмний хайртай энэ хамтлаг маань удахгүй асар том тоглолтоо хийх гэж байна. Харанга хамтлагийнхны тоглож байсан гитар, эд хэрэглэл, цомгийн үзэсгэлэнг та бүхэндээ хүргэнэ.

“Харанга 30 жил-Замд гаръя…” тоглолтод Монголын орчин үеийн шилдэг хамтлаг дуучид болох “Хурд”, “Нисванис”, “Madness”, “Fire”, “The lеmons”, “A sound”, “Rec on”, “Чингис хаан” хамтлагийн ахлагч, гавьяат жүжигчин Д.Жаргалсайхан, гавьяат жүжигчин Т.Ариунаа, “Зууны манлай эстрадын дуучин” Б.Сарантуяа, “Никитон” хамтлагийн дуучин Б.Батчулуун, гитарчин Д.Өлзий-Орших, дуучин С.Наран, Б.Чойжоо, альтернатив дуучин Х.Отгончимэг, “Киви”-гийн Д.Уламбаяр, Реппер Big Gee нар оролцох юм байна. “Харанга” хамтлаг тэгш ойгоо угтан 1997 онд гаргасан “Эрин зууны хөг”, “Best of Haranga”, 2000 оны “Бодлын тэнгис”, 2003 оны “Ертөнцийн өнгө” цомгоо дахин хэвлүүлж, сонсогчдодоо хүргэхээр болжээ. Тэд 30 жилийн ойдоо зориулан шинэ уран бүтээлээс бүрдсэн цомгоо ирэх аравдугаар сард багтаан худалдаанд гаргах аж. Тус хамтлаг 30 жилийн ойн тоглолтоосоо өмнө шүтэн бишрэгчдэдээ олон гэнэтийн бэлэг барихаар бэлдсэний нэг нь тус хамтлагийн түүхийг өгүүлэх баримтат нэвтрүүлэг, реалити нэвтрүүлгийг хүргэхээс гадна “VOLUME-1” пянз гаргахаар болжээ. “Харанга 30 жил-Замд гаръя…” тоглолтын тасалбарыг ticket.mn сайтыг ашиглан захиалах боломжтой бөгөөд тоглолтын тасалбар суудлын байршлаасаа хамаарч 30, 40, 60 мянган төгрөгөөр өнөөдрөөс борлуулагдаж эхэллээ.