Чөлөөт бөхийн ДАШТ Казахстаны нийслэл Нур-Султанд энэ сарын 14-22-нд явагдаж өндөрлөсөн. Монгол Улсын шигшээ баг энэ удаад эрэгтэй, эмэгтэй чөлөөт бөхөөс гадна сонгомол барилдаанд оролцсон бөгөөд манай бөхчүүд гурван хүрэл медаль, олимпийн хоёр эрхтэй эх орондоо ирэхээр болоод байгаа билээ. Гурван хүрэл медалийг эмэгтэйчүүд авсан. Тухайлбал, эмэгтэйчүүдийн 55кг-ын жинд Б.Болортуяа, 59кг-ын жинд Б.Шоовдор, 68кг-д С.Батцэцэг нар хүрэл медаль хүртсэн. Харин эрэгтэйчүүдийн шигшээ багаас медаль аваагүй юм.

Харийн дэвжээнээс амжилтын сэжүүр атгасан эмэгтэй шигшээ багийн тамирчид мань энэ сарын 23-ны өдөр эх орондоо ирэх байсан. Харамсалтай нь, тодорхой бус шалтгааны улмаас хойшлогдож, ничлэгийн тийзээ хүчингүй болгосон тохиол гарчээ. Тодруулбал, 12 хүн онгоцны нислэгт бүртгүүлэлгүй дүрэм зөрчсөн гэж тэднийг буулгаж тасалбарыг нь хүчингүйд тооцсон байна. Чухам юунаас болж онгоцны тийзийг үхүүлэв гэхээр тамирчдыг хариуцаж явсан дасгалжуулагч нарын хайнга, хариуцлагагүй байдлаас болж нисэх боломжгүй гэж үзсэн аж.

Албаны эх сурвалжийн хэлснээр “Манай багш дасгалжуулагчдаас шалтгаалсан зүйл байгаагүй. Байрласан буудлын оффисоос байрлах хоногийн хугацаа регистираци нь дутуу хоног хийж тооцсоноос ийм байдал үүссэн” гээд байгаа юм. Монгол Улсын шигшээ багийн эмэгтэй тамирчид өнөөдөр эх орондоо ирнэ. Тэд чухам хэний буруугаас болж онгоцны билетээ үхүүлж, хоёр хоног саатав гэдэг нь тэр үед тодорхой болох биз.

Тив, дэлхийн тэмцээнд амжилттай оролцож эх орныхоо нэрийг өндөрт гаргаж байгаа хэдий ч татвар төлөгчдийн мөнгөөр явж байгаа гэдэг утгаар тамирчин, дасгалжуулагчид хэн ч байлаа гэсэн хаа хаанаа хариуцлагатай л хандах учиртай.Тэгэхгүйгээр салан баавгайн үлгэр шиг хааш яаш хандаад байвал Монгол Улсын төсөвт ч гарзтай байх нь тодорхой. Ямартай ч хэний буруугаас болж тамирчдын нислэгийн тийз “үхсэнийг” тогтоож буруутай этгээдээр зардлыг гаргуулах нь нүдээ олсон явдал болох байх. Монголын тамирчид ямар анх удаа тив алгасч, тэнгэрт хөөрч дэлхийн тэмцээнд явж байгаа биш дээ.