“Монголын сэтгүүлчдийн нэгдсэн эвлэл” (МСНЭ)-ийн Ерөнхийлөгч Х.Мандахбаяртай холбоотой асуудлаар “Ноцтой мэдээ” сонины эрхлэгч, яруу найрагч Б.Галсансүх тэргүүтэй сэтгүүлчид өнөөдөр хэвлэлийн хурал зарлалаа.

“Тв4” телевизийн мэдээний албаны дарга З. Бадар-Ууган:

“Сэтгүүлчдийн нэгдсэн эвлэлийн хуралдааны үеэр Х.Мандахбаяр гэдэг хүнийг МСНЭ-ийн Ерөнхийлөгчөөр томилохыг эсэргүүцэн мэргэжлийн бүх холбоонууд тус хурлыг орхиж гарсан байдаг. Тэнд зөвхөн түүний тойрон хүрээлэгчид, гар хөл бологчид л үлдэж тэдний санал асуулгаар МСНЭ-ийн Ерөнхийлөгчөөр томилогдож байсан. Үүнээс хойш Мандахбаяр нь улс төртэй нилээд холбогдсон баримтууд байгаа. “Улс төрч, сэтгүүлч хоёр хэзээ ч нэг хөнжилд орж болохгүй” гэсэн үг байдаг. Энэхүү зарчмыг эрхэм Ерөнхийлөгч маань алдагдуулан өнгөрсөн хугацаанд улс төрд чиглэсэн үйл ажиллагаануудыг явуулж ирсэн. Үндсэндээ Сэтгүүлчдийн нэгдсэн эвлэл гэх байгууллагыг удирдаж байгаа тэргүүний хувьд сэтгүүлчдийн эрх ашиг, сэтгүүл зүйн салбартаа голлон анхаарах биш хувийн карьерийг өсгөх, өөрийн нэр хүндийг улс төрд хэрхэн ахиулах вэ гэдэгт хүч хөдөлмөрөө зориулж байна. Ингэхдээ МСНЭ-ийг ашиглаж ирснийг сэтгүүлчид сайн мэдэж байгаа. Сүүлийн үед өөрийн мэдлийн хэвлэл мэдээллийн хэрэгслээр болон хүрээллийн байгууллагуудтайгаа хамтран дайрч, доромжлох, гүтгэх зэрэг үйл ажиллагааг эрчимтэй явуулж байгаа гэдэг баримтуудыг зарим нэг хэвлэл мэдээллийн байгууллагаас өгч байна. Өөрийнх нь талаар үнэн бодит байдлыг илчилж байгаа, илчлэхийг оролдсон тохиолдолд ямар нэгэн аргаар тэрхүү бодит мэдээллийг мушгин гуйвуулж, мэдээллийг хийх гэж байгаа эсвэл хийсэн хүн, ХМБ-ыг худалдагдсан эсвэл “шантаажчин” гэх мэтээр цоллож, ярьж байгаа нь өөрийн албан тушаалаа өгөхөөс “үхтэлээ” айж байна гэдэг хардлагыг улам баталж байна”

“Ноцтой мэдээ” сонины эрхлэгч Б.Галсансүх:

“Уул уурхай бол монголчуудын хувьд хамгийн эмзэг сэдэв. Үүн дээр дөрөөлөн эх орончийн дүрд тоглож, олонд танигдах гэж зүтгэж байна. Х.Мандахбаяр бол эх орон, газар шороондоо хайртай хүн биш. Яагаад гэвэл өөрөө Өмнөговь аймагтаа “Их шижир баялаг” гээд уул, уурхайн компанитай. Хувьдаа нүүрс зөөдөг машинтай. Үүгээрээ Монголын баялгийг өдөр, шөнөгүй Хятад руу зөөдөг мөртлөө эх оронч болж жүжиглэж буй нь гутамшигтай. Уул, уурхайг би хаалгасан гээд “Ардын баатар” болоод яваа хүн үнэндээ шоудаж байгаа шүү. Уул уурхайг хаагаагүй. Үнэндээ Тосон бумбын нуруунд хятад эзэнтэй уурхайнууд одоо хүртэл ажиллаж байна. Бүх уурхайг хаалгаад, уул усаа аварчихсан гэж бодож байгаа бол эндүүрэл. Энэ хүн бие муутай. “Өнөөдөр харвалаа, албан тушаалаа өглөө” гэдэг. Маргааш нь “Уул, уурхайг хаалгачихлаа, би буцаад Ерөнхийлөгчийн ажлаа авлаа” гэдэг. Х.Мандахбаяр эрүүл хүн мөн үү? Энэ хүн МСНЭ-ээр тоглож болсон. Одоо Онц их хурал зарлаж, сэтгүүлчид нэгдэж, түүний энэ увайгүй үйлдлийг таслан зогсооё” гэв.

"Хатуу мэдээ" сайтын найруулагч Б.Мөнхтөр:

“Тосон бумбын нулимс” нэвтрүүлэг 2017 оны дөрөвдүгээр сард хийгдсэн. Түүнээс хойш хоёр жил өнгөрөхөд Х.Мандахбаяр юу ч хийгээгүй, зүгээр л боломжийг хараад сууж байсан. Өөрөөр хэлбэл тухайн үед уурхайн үйл ажиллагаа эхлээгүй, хэрүүл тэмцэл хийхэд ямар ч ашиггүй байсан гэсэн үг. Яг цагаан сарын үеэр уурхайг ухаж эхэлсэн байдаг. Тэгэхэд нутгийн иргэд эсэргүүцэл үзүүлж, зам харгуйг нь хааж, хагалгаанд орсон хүн хүртэл өвлийн хүйтэнд тэмцээд явж байсан. Энэ үед Х.Мандахбаяр 11 өрөө байрынхаа найрыг хийгээд, баярлаад сууж байсан. Ер нь бол их баярлаж, наргиж, цэнгэх дуртай. Хэрэв үнэхээр эх оронч юм бол Х.Мандахбаяр тэр үед ухаж эхлээгүй байхад тэмцэх нь яасан юм. Тэгэхээр эндээс ганц л дүгнэлт хийж болно. Ухуулаад, сенсааци үүсэхэд бэлэн болсны дараа араас нь “сэлэм барьж” дайрсан. Үүнээс гадна нэг ноцтой мэдэгдэл өөрийн цахим хуудастаа бичсэн байдаг. Сэтгүүлчид МСНЭ-д татвар төлөөгүй бол БНХАУ руу сурвалжлага бэлтгэхээр явах эрхгүй гэсэн байсан. Үүнийг юу гэж ойлгох вэ. МСНЭ-ийг БНХАУ-ын суртал, ухуулгын хэлтэс хянаж байна гэсэн үг үү. Одоо Өмнөд Солонгосын визэнд ороход татвар төлөөгүй бол тодорхойлолт гаргаж өгөхгүй гэж байна. Монгол сэтгүүлчийн гар, хөлийг мухарлах, явах замыг өөрөөрөө дамжуулах ийм л арга хайж байна. Тэгэхээр ийм хүнээр бид удирдуулаад явах шаардлага байна уу. МҮОНТ-ийн сэтгүүлч А.Бүрэнбаатартай бид нэгдэж байна" гэсэн юм.