-“Урт дурын” жолооч нарыг бүртгэлжүүлэхгүй бол охидыг маань хүчиндэж, хоолойг минь боомилон, хулхидах нь хэрээс хэтэрлээ-

Дэлхийн хотуудад нэн түрүүн шаардлагатай зүйл нь хөл дүүжлэх унаа байдаг. Аль ч улсын нисэх буудал дээр хөл тавихад л такси үйлчилгээ нь анхаарал татдаг. Нэгэнтээ Берлиний “Tegel”-ийн олон улсын нисэх буудлаар дамжин явахад хамт явсан генерал Б.Баярмагнай “Эндхийн бүх такси нь “Мерседес бенц” шүү дээ. Герман чинь өөрийнхөө юманд ийм л хүндэтгэлтэй ханддаг улс” гэж билээ. Нээрээ ч тэнд анзаарвал япон, солонгос, америк тэрэг ганц ч харагдаагүй юм даг.

Бээжинд яваад очиход таксины жолооч нь үйлчлэгчээсээ тусдаа торон бүхээгтэй, тоолуур нь ил тод харагддаг юм билээ. Ер нь аль ч улсад очсон такси нь бусад унаа тэрэгнээс ялгагдахуйц таних тэмдэг симфортой байдаг. Монголд такси үйлчилгээний тухай ойлголт жилээс жилд бүдгэрсээр байна.

Уг нь таксины хэд хэдэн компани байсан сан. Одоо тэгтэл ганц нэгхээн компани байна уу, үгүй юу болчихлоо. Гуравхан сая хүн амынх нь 1.5 сая нь оршин суудаг Улаанбаатар хотод такси барина гэдэг үнэн тамын ажил болсон. Есөн зуун мянга гаруй машиных нь долоон зуун мянга орчим нь нийслэлд хөдөлгөөнд оролцож байгаа. Хотын хоёр хүн тутмын нэг машинтай гэсэн үг. Гэтэл сэтгэлд хүртэл үйлчлээд өгөх такси тэр бүр таарахгүй нь гачлантай. Гар өргөөд зогсож байтал дайрчих шахсан нэг давилуун юм давхиж ирээд цонхоо онгойлгон “Хаа явах вэ” гэж байцаана. Унаа хэрэгтэй болоод гар өргөж байгаа хэрэг шүү дээ. Такси үйлчилгээнд явж л байгаа бол хаа ч байсан аятайхан үйлчлээд хүргээд өгөх учиртай л баймаар. Өөрийнх нь явах зүг л биш бол тоох ч үгүй хаяад одно. За, энэ ч яах вэ гэж бодъё.

Таксины жолооч нар орой үдэшхэн ерөнхийдөө авд морддог гэхэд хилсдэхгүй. Гайгүй шиг хувцас хунартай халамцуу нөхрийг урд талын суудалдаа суулгангуутаа бүхээгийн халаалтаа өндөр хэмд тавьчихна. Дотор халуунтай явсан нөхөр хүйтэн гудманд унаа хүлээж даарч бээрчихсэн амьтан пүнхийсэн халуун орчинд оруутаа л нам дугжирна. Тэр хооронд мөнөөх нөхрийг өрөвдөх ч юмгүй гар утас, цүнх, хувцсыг нь мултлаад гудманд хаяад явчихна. Шөнө такси барьсан олон эрчүүд ийм байдалд орсноо ярьдаг. Энд хүн чанарын ямар ч баталгаа байхгүй байгаа биз. Ууш цэнгүүний ойролцоо отоонд байж байгаад хацар нь ягаарч харц нь талимаарсан ганц нэг охидыг шүүрчихнэ. Үүнийгээ хасгийн хөх ямаа булаалдахтай адилтгах нь олонтаа. Хөөрхий охид бүсгүйчүүлийг авч давхиад хотын ойролцоох аль нэг уулын аманд аваачаад хүчиндчихнэ. Албан ёсны бүртгэлтэй такси баазынхан бол ингэж чадахгүй. Ядаж л тэр компанийн такси байна гэж таних шүү дээ.

Манайх шиг эрээвэр хураавар машины сэгээр дүүрсэн хотынхонд бол таксины соёлтой үйлчилгээ падлий ч байхгүй. Эсрэгээрээ таксины жолооч нар хохирох үзэгдэл бас мэр сэр гарнаа. Таксины жолоочийг хүн гарууд баахан унаж унаж давхичихаад сүүлд нь эзгүй хороололд аваачин боомилсон хэрэг хэдэнтээ гарч байсан. Такси үйлчилгээ нэгдсэн тогтолцоонд орсон газарт бол ийм зүйл болохгүй шүү дээ. Ядаж л жолоочийнхоо эрх ашгийг хамгаалж дохиоллын систем суулгаж өгнө өө дөө. Таксины жолооч нарын нэг муухай зан нь хий мөнгө саадаг явдал. Мянга таван зуу гардаг газарт явчихаад л 2500 төгрөг гээд нэхээд хэвтчихнэ. Шунал нь шулам болсон утгаараа ч манай таксичид үнэн булай шүү дээ. Яаж ч тэр мөнгө өөрт нь буян болж наалдах вэ дээ гэмээр загнана. Энэ мэтээр такси үйлчилгээ тойрсон асуудлыг яриад байвал хэзээ ч барагдахгүй дээ.

Такси үйлчилгээ байхгүй талын Монголын нийслэлд гадаадынхан аялал жуулчлалаар ирлээ гэхэд дахиж л лав ирэхгүй гэдэгтэй мөрийцсөн ч ядах юм алга.