Монгол хүн, тэр дундаа малчны хүүхдийн амь үнэгүйдсэн өнөө цагийн өнгийг тодорхойлсон нэгэн үйл явдлын эргэн тойронд чухам юу болоод байгааг уншигч та бүхэнд хүргэхээр зорилоо. Энэ сарын 13-14-нд шилжих шөнийн ээлжинд ажиллаж байсан “Хүннү Эйр” ХХК-ийн ажилтан өндрөөс унаж хүнд гэмтэл авсан тухай манай Мэдээ.мн сайт өмнө нь мэдээлсэн. Тэгэхдээ “Энэ осол оройн 23.25 цагт болсон бөгөөд 23.42 цагт Түргэн тусламжийн 103-аар авч явсан тухай “Чингис хаан” олон улсын нисэх онгоцны буудлын жижүүрийн тэмдэглэлд бичигдэн үлдсэн байна. Харин энэ тухай цагдаагийн байгууллагад огт мэдэгдээгүй өнгөрсөн байдаг. Нэр хүнд бүхий ийм том компани нэг ажилтнаа онгоц бүтээх гэж байгаад унаж хүнд бэртэл авсныг дуулаагүй байна гэж үгүй, харин тоохгүй байна гэвэл үнэнд ойртох байх. Техникч О.Мэргэншагайн хувьд “Гавлын ясны цууралт, хугаралт, тархины суурь яс цууралттай” гэсэн оноштойгоор өчигдөр өглөөний 07 цагийн үед тархины хагалгаанд орсон боловч биеийн байдал муу, дахин хагалгаанд орох шаардлагатай гэсэн байна” гэж мэдээлж байлаа. Мөн түүний үеэл ах нь дүүгийнхээ төлөө санаа тавьж,болсон үйл явдлыг тодруулахыг хичээсэн боловч “Хүннү Эйр” компанийхан болон “Чингис хаан” нисэх буудлын удирдлагууд энэ асуудалд тун хойрго хандсан талаар мэдээлсэн. Хэрэг болсноос хоёр хоногийн дараа түүний ах Д.Совд өөрийн нүүр хуудсандаа “Аравдугаар сарын 16-нд 22:10 цагт. За ямар ч байсан Та бүхнийхээ хүчээр, дэмжлэгээр хэрүүл хийн байж орой ч гэсэн яг 72 цагийн дараа осол болсонг нь тус компаниар нь хүлээн зөвшөөрүүлж чадлаа / ЗТХЯам, ИНEГ, Чингис хаан ОУ-н нисэх буудал, ЦEГ дутуу байна/, хэргийг цагдаагаас нуусан байсныг нь ил болгож цагдаад өргөдөл гаргаж шалгалтыг эхлүүлж, мэргэжлийнх нь хяналтын байгууллагаар нь нисэхийн аюулгүй байдлыг нь шалгуулж эхлүүллээ! Болоогүй, дүүгээ ухаан оруулсны дараа хэн нь хэн бэ-г баталгаа нотолгоотой нь гаргаад тавинаа! Жич: Гэмтэлийн эмнэлэг ЭМСайдаас анхаарч бүхий л арга хэмжээг цаг алдалгүй авч байгааг энд тодотгох байна” гэсэн пост оруулж байсан бол, 2019 оны аравдугаар сарын 19-нд “Монгол төр, Монголын төрийн байгууллагууд жирийн малчны хүүгийн амь нас, эрүүл мэндийг гаргуунд нь гаргаж байна. Миний дүү болох О.Мэргэншагай нь “Хүннү Эйр” компанийн онгоцны далавч дээр ажлаа хийж байгаад компани нь хөдөлмөр аюулгүй байдлын нөхцөл хангаж өгөөгүйгээс шалтгаалж өндрөөс унаж, тархины маш хүнд гэмтэл авсан одоо ГССҮТ-д ухаангүй тав хонож байна. Миний дүү 132 цаг ухаангүй, амь нас нь дээсэн дөрөөн дээр дэнжигнэж байхад холбогдох байгууллагууд юу ч болоогүй юм шиг нэр хүнд, албан тушаал, арьсаа хамгаалж 132 цаг аман дотроо хэлээ хазсан байдалтай байна даа” гээд хүнд сурталтай тэмцэхэд туслаач гэж сэтгэгдэл үлдээсэн байв.

Харин хоёр хоногийн өмнө “Миний дүү ухаан ороогүй 6 хоног яг 156 цаг боллоо, дүүгээ сэргээх, цаг алдалгүй эмчилгээг нь эрчимжүүлэхэд Та бүхний хүч надад хэрэгтэй байна. Миний дүү ухаан ороогүй зургаа хоног болж байхад холбогдох төрийн байгууллагууд энэ ноцтой ослыг одоо хүртэл нисэхийн цагдаатайгаа хамтран зургаа хоног нуун дарагдуулж олон нийтэд үнэн бодит мэдээллийг зарлахгүй, мэдээлэхгүй байна. Иймээс би “Чингис Хаан” ОУНБ-аас гаргасан ослын талаарх баримтыг ил болголоо. Гэхдээ энд маш ноцтой нь ослын талаар анх дуудлага өгөхдөө "өндрөөс унасан биш, ухаан алдсан" гэж буруу мэдэгдсэн нь миний дүүг анхны тусламж авах боломжоор хангаагүй амь насыг нь эрсдэлд оруулах гол шалтгаан болсон байгаа юм” гээд дараахь баримтыг дэлгэсэн байна.