Монгол Улсын Шадар Сайд Ө.Энхтүвшин мэргэжлийн хяналтын байгууллагын үйл ажиллагааны талаар бизнес эрхлэгчидтэй өнөөдөр нээлттэй хэлэлцүүлэг хийлээ. Уулзалтанд Шадар сайд, Шадар сайдын дэргэдэх агентлаг, Мэргэжлийн хяналтын ерөнхий газар, Нийслэлийн мэргэжлийн хяналтын газар, Шударга өрсөлдөөн хэрэглэгчдийн төлөө газрын дарга нар болон бизнес эрхлэгчид оролцсон бөгөөд уулзалтын хүрээнд бизнес эрхлэгчдэд тулгамдаж буй асуудал, санал хүсэлтийг хүлээн авсан юм.

Тэдний саналыг нэгтгэн Ерөнхий сайдад өргөн барьснаар холбогдох асуудлуудыг шийдвэрлэх болно гэдгийг албаны зүгээс мэдэгдсэн. Нийт 170 гаруй жижиг, дунд бизнес эрхлэгчид оролцсоноос төлөөлөл болгон “Голс” Адууны өлөн гэдэс боловсруулах ХХК-ны захирал Ц.Амарсанаагаас Мэдээ.мн тодруулга авлаа. Тэрээр “Өнөөдрийн уулзалтаас нилээн өндөр үр дүн хүлээж байгаа. Монгол Улсын бизнесийн салбарт хууль бусаар үйл ажиллагаа явуулдаг Хятад компаниуд маш их байгаа. Бидний зүгээс албан ёсоор улсдаа татвараа төлөөд үйл ажиллагаагаа явуулдаг. Гэвч Монгол Улсад бизнес эрхэлж байгаа зарим нэг Хятадын компанийн үйл ажиллагааг мэргэжлийн хяналтын байгууллагаас зогсоож “дийлэхгүй” байгаа бололтой. Иймд өнөөдрийн уулзалтаар үүнийг Шадар сайдад уламжлаад хууль бус бизнес эрхэлж байгаа компаниудын үйл ажиллагааг зогсоох тал дээр мэргэжлийн хяналтын байгууллагатай хамтран ажиллая гэдэг саналыг тавьж байна” гэсэн юм.