Хөглөгөр хөвч хангайн эзэн хүрэн бор баавгай хүнтэй их л дотносож үе үехэн гэр орноор нь “айлчлах” нь ихсэв. Хээрийн зэрлэг эл амьтан хээвнэг төв суурин газарт ойртож ирэх нь хэвийн үзэгдэл болсон төдийгүй малчин айлын гэр хотонд халдан, тэр ч байтугай эрдэнэт хүний амь насыг бусниулсан тохиолдол энэ намар бүртгэгдлээ. Саяхан гэхэд л Богд уулын Их тэнгэрийн амны баруун урд Зайсангийн амны зүүн урд хэсэгт баавгай явсан ул мөр, баавгайн баас байгааг Ан амьтан хамгаалах нийгэмлэгийнхэн илрүүлсэн талаармэдээлсэн. Идэш тэжээл хомсдсоноос болж баавгай ийнхүү хөвчөөс тал хээр рүү буун ирж, хүн, малд халдах тохиолдол гардаг байна. Майга борын өдөөсөн явдал үүгээр дууссангүй Хэнтий аймгийн Батширээт сумын төвөөс хойш Цагаан горхины адаг гэдэг газар намаржиж байсан малчин Д.Оюунцэцэгийн гэр рүү энэ сарын 18-ны өдөр баавгай дайрчээ. Энэ тухай мэдээллийг Д.Оюунцэцэг тэр даруй ирүүлсэн байна. Дуудлагын дагуу сумын Засаг даргын орлогч, багийн Засаг дарга, байгаль хамгаалагч, анчнаас бүрдсэн ажлын хэсэг орой нь тухайн айлд очсон аж.

Баавгай гэр рүү нь дайраад байсан учраас гэрийн эзэгтэй өөр айлд очсон байж. Ажлын хэсгийнхэн эмэгтэйг замаараа айлаас авч, гэрт нь очиход баавгай үзэгдээгүй. Тэр шөнөдөө ажлын хэсгийнхэн айлын намаржааг эргэж тойрч хоносон. Гэтэл маргааш өглөө нь нөгөөх айл руу баавгай дахин дайрч, гэрт орж ирэхэд нь буудаж, устгасан байна. Аймгийн Засаг даргын захирамжаар байгуулагдсан Ажлын хэсгийн зөвшөөрөлтэйгөөр баавгайг устгажээ. Үхсэн баавгайг аймгийн Байгаль орчны газрын даргаар ахлуулсан тусгай ажлын хэсэгт хүлээлгэн, өгч устгалд оруулсан аж. Урьд нь Батширээт сумын Хурх багт өнгөрсөн есдүгээр сард баавгай айлын гэр рүү дайрч, мөн буудаж устгасан байна. Иргэдийн мэдээллээр тус суманд 10 гаруй баавгай байгаа гэнэ. Мөн саяхан нэг баавгайг уяагаар хүлж, хөөж, уул руу тавьжээ. Баавгай мал руу дайрсан тохиолдол бол олон байгаа юм байна. “Баавгайд хоол тэжээл дутагдсанаас хүн, мал руу дайрч байгаа нь тодорхой бөгөөд сая устгасан баавгайн гэдсэнд гэхэд шорооноос өөр хоол тэжээл байгаагүй” гэж Батширээт сумын Засаг дарга М.Болд ярьсан байсан.

Хэнтий аймгийн Батширээт сумын уугуул, Монголын зохиолчдын эвлэлийн шагналт яруу найрагч Алтанзагасын Түмэнбаяр саяхан нутгаасаа ирээд байгаа бөгөөд түүнээс хэд гурван зүйл тодрууллаа.

-Батширээт суманд баавгай айл руу дайрч, буудаж хөнөөсөн гэх юм. Энэ үнэн үү?

-Үнэн. Манай сумын хойд талаар энэ жил баавгай их элбэг орж ирж байгаа. Ер нь манай Батширээт чинь баахалдайн орон л доо.

-Баахалдай гэж юуг хэлж байна?

-Манай буриадууд баавгайг баахалдай гэдэг.

-Баавгай сумын төв рүү бүр ойртож ирсэн хэрэг үү?

-Сумын төвийн ар талын айлуудын тэжээдэг зөгийний үүрүүдийг бусниулсан тохиолдол нэлээд гарсан. Хүмүүс жимсэнд явах гэхээр ойн захаар отоод, загасанд явж байхад голын цаагуур дагаад амар заяа үзүүлэхгүй байсан юм билээ.

-Айл руу дайрсан баавгайг буудаж алсан гэсэн үү?

-Тэгсэн байна лээ. Би сая хоёр гурван хоногийн өмнө Батширээт ороод ирсэн. Тэгэхэд манай нутгийнхан баавгай харах гэж байгаа, баавгайтай зураг авахуулна гэж унаатай унаагүй хөлхөөд сүйд болоод байсан.

-Хүнээс ер айхгүй гэгээн цагаан өдрөөр ойртоод ирчихээд байжээ дээ?

-Тийм юм билээ. Манай нутгийнхан ч баахалдайг тэгтлээ тоохгүй л дээ.

-Тэр баавгай тэгээд яасан юм?

-Айлын эзгүй гэр түйвээсэн юм билээ.

-Тэгээд буудчихаа юу? Баавгай агнах чинь уг хориотой доо?

-Сумаас комисс гараад устгалд оруулах болсон юм билээ.

-Баавгайг алж устгалд оруулахыг сумын засаг захиргаа мэддэг юм уу?

-Байгаль орчны яамнаас л баавгайг алж шатаах комисс томилж, тушаал гаргасан гэж байсан.

-Тэгээд шатаасан юм бол уу?

-Шатаасан гэсэн.

-Баавгайны арьс, савар, өөх тос, алив эрхтэн нь жигтэйхэн үнэд хүрдэг гэсэн. Сум орон нутгийн орлого болгож болохгүй байсан юм байх даа?

-Тэрийг ёстой мэдсэнгүй. Ямар ч л гэсэн алаад шатаах тушаалтай байсан юм билээ.