Аравдугаар сарын 21-ний өдөр “Зөрчлийн хууль”-ийг эсэргүүцэж Баянгол дүүргийн жижиглэнгийн худалдаа эрхэлдэг иргэд мэдээлэл хийсэн. Тэд Хууль зүй, Дотоод хэргийн яамыг ажлаа хийхийг шаардаж, хагас өлсгөлөн зарлахаа мэдэгдээд байсан билээ.

Тэгвэл шаардлага хүргүүлсэн өдрөөс хойш өнөөдрийг хүртэл ХЗДХ-ийн сайд Ц.Нямдоржоос ямар нэгэн хариу, шийдвэр ирээгүй байгаа тул иргэн С.Мишиг шаардлагын хариу иртэл өлсгөлөнгөө зогсоохгүй гэлээ. Тэрбээр мэдэгдэл хийснээс хойш ийнхүү гурав дахь өдрөө “Хэлмэгдэгсдийн хөшөө”-ний хажууд тэмцлээ үргэлжлүүлж байна. Мэдээ.мн иргэн С.Мишигтэй ярилцлаа.

“Энэ бол ард түмний язгуур эрх ашгийн төлөөх тэмцэл”

-“Зөрчлийн хууль”-ийг эсэргүүцэж, ямар шаардлагыг хүргүүлсэн бэ?

-Өлсгөлөн зарлаад гурав хонож байна. Ерөнхийдөө гурван шаардлагыг хүргүүлсэн бөгөөд үүнээс хоёр нь өнөөдрийн байдлаар эерэгээр шийдэгдсэн байна. Эхний нааштай шийдвэр гарсан асуудал бол СХД-ийн 13 дугаар хорооны нутаг дэвсгэр Хамбын-Овооны ойр орчим байгаа 40-өөд айл өрхийн цахилгааны асуудлыг шийдвэрлэх байсан. Энэ асуудлын хүрээнд Нийслэлийн Засаг даргын орлогч Ж.Батбаясгалан өөрийн биеэр очиж, танилцаад эхний ээлжинд түр хугацаагаар цахилгаан өгөхөөр болсон. Хоёр дахь шаардлага “Зөрчлийн тухай хууль”-ийн торгуулийн заалтад өөрчлөлт оруулж иргэдэд уян хатан сонголттой болгох байсан. Өчигдөр энэ хүсэлтийг харгалзан үзээд ажлын хэсэг байгуулахаар болсон байна лээ.

-Гурав дахь шаардлагын тухайд?

-Нийслэлийн Худалдаа үйлчилгээний журмыг батлах тухай яаралтай арга хэмжээ авах асуудлаар ХЗДХ-ийн сайд Ц.Нямдоржид хандсан боловч өнөөдрийг хүртэл ямар нэгэн хариу өгөөгүй байна. Одоогоор хагас өлсгөлөн зарлаад байна.

-Ганцаараа өлсгөлөн зарласан уу?

-Тийм. Гэхдээ иргэд, олон нийт маш их дэмжиж байгаа.

-Өлсгөлөн зарлаад гурав хоносон гэлээ. Энэ хугацаанд ямар нэгэн шахалт дарамт ирэв үү?

-Бэрхшээл гэх зүйл байсангүй. Өлсгөлөн зарлах хугацаанд цагдаагийн албан хаагчид болон эмнэлгийн байгууллагын зүгээс миний аюулгүй байдал, эрүүл мэндэд онцгой анхаарч байна. Тэдэнд маш их талархаж байна.

-Энэ тэмцлээ хэзээ дуусгах вэ?

- Одоогоор Ц.Нямдорж сайдын шийдвэрийг хүлээж байна. Даваа гарагт өөрт нь албан ёсоор шаардлагаа хүргүүлсэн.

- Ямар хариу шийдвэрийг хүлээж байгаа юм бэ?

- Өнгөрсөн дөрөвдүгээр сард Ц.Нямдорж сайдтай би өөрийн биеэр уулзаж байсан. Тэр үедэнэ хуулийн торгуулийн зохицуулалтын учир дутагдалтайг хэлээд, дээд доодхязгаар байх ёстой гэж байсан. Гэтэл сая Засгийн газраас их хуралд хуулийн төслийг өргөн барих үеэрээ энэ талаар оруулаагүйд сэтгэл дундуур байна.Миний хувьд хохирлын хэм хэмжээнд таарсан шийтгэлийг лард түмэн авъя гэдэг зүйлийг хэлж байгаа.Тиймээс шийдвэр гартал өлсгөлөнгөө зогсоохгүй.