Улсын бүртгэлийн ерөнхий газрын дарга Б.Баасандорж, тус газрын Мэдээллийн технологийн газрын дарга Д.Ган-Эрдэнэ, Азийн хөгжлийн банкны “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл”-ийн зохицуулагч Г.Пүрэвсүрэн нар 2019 оны 10 дугаар сарын 25-27-ны өдрүүдэд Хэнтий аймгийн Улсын бүртгэлийн хэлтсийн үйл ажиллагаатай танилцаж, Чингис хотод ажиллалаа.

Хэнтий аймаг дахь Улсын бүртгэлийн хэлтэс /аймгийн төв, 18 сум, 1 тосгон/ 100 хувь улсын бүртгэлийн нэгдсэн сүлжээнд холбогдож байгаатай холбогдуулан ажил хүлээн авах, орон нутгийн удирдлагуудтай уулзахад тус албан томилолтын зорилго оршиж байв.

Өнөөдрийн байдлаар Монгол Улсын 21 аймгийн 220 гаруй сум нь улсын бүртгэлийн онлайн сүлжээнд холбогдож байгаагаас Хэнтий аймаг нь анхдагч буюу 100 хувь нэгдсэн сүлжээнд холбогдсоноор улсын бүртгэлийн байгууллагаас үзүүлж буй үйлчилгээг түргэн шуурхай авах нөхцөлийг бүрдүүлж байгаа юм. Өмнө нь алслагдсан сумын иргэн аливаа тодорхойлолт, лавлагаа болон улсын бүртгэлийн бусад үйлчилгээг авахын тулд 300 гаруй км зорчиж, аймгийн төвийн Улсын бүртгэлийн хэлтсээс авдаг байсан бол өнөөдөр тухайн сумын улсын бүртгэгч мэдээллээ онлайн сүлжээгээр төв рүүгээ шилжүүлснээр иргэдийн цаг зав, эдийн засгийн зардлыг хэмнэх боломжийг бүрдүүлж байгаагаараа онцлог аж.

Энэ онд Архангай, Баянхонгор, Говьсүмбэр, Дорноговь аймгийн бүх сумдыг нэгдсэн сүлжээнд холбосноор нийт сүлжээнд холбогдсон сумдын тоо 270 болж буй юм. 2020 онд Азийн хөгжлийн банкны техникийн туслалцааны дэмжлэгтэйгээр хэрэгжиж байгаа “Нийгмийн үйлчилгээний хүртээмжийг сайжруулах зорилгоор бүртгэлийн системийг боловсронгуй болгох төсөл”-ийн буцалтгүй тусламжийн хүрээнд Монгол Улсын 21 аймгийн 330 сум, нийслэлийн 152 хороог бүрэн холбож дуусгахаар Улсын бүртгэлийн ерөнхий газар ажиллаж байна.

Хэнтий аймгийн Улсын бүртгэлийн хэлтсийн үйл ажиллагаатай танилцах үеэр Улсын бүртгэлийн ерөнхий газрын дарга Б.Баасандорж, Хэнтий аймгийн Улсын бүртгэлийн хэлтсийн дарга Б.Төрхүү, “Гэрэгэ системс” ХХК-ийн захирал Ц.Эрдэнэбат болон бусад албаны хүмүүс тус хэлтэст “Гэрэгэ” киоскийг байршуулах нээлтийн арга хэмжээнд оролцов. “Гэрэгэ” киоск нь төлбөр тооцооны бүхий л үйлчилгээг гүйцэтгэх чадвартай нийгмийн сүлжээ бөгөөд аймгуудын улсын бүртгэлийн хэлтсээс хамгийн түрүүнд Чингис хотод байршууллаа. Өнөөдрийн байдлаар уг киоскоор улсын бүртгэлийн 53 үйлчилгээ үзүүлж байна. Ингэснээр иргэдэд үзүүлэх үйлчилгээ нэг шат ахиж, өөрөөр хэлбэл банкны төлбөрийг тус киосконд хийх, иргэний үнэмлэхийн ар талд буй QR кодыг уншуулснаар өөрийн овог, нэр, регистрийн дугаарыг шивэх шаардлагагүй болсон юм.

Улсын бүртгэлийн үйлчилгээг авахад банк орж төлбөр төлдөг байсан бол өнөөдөр “Гэрэгэ” киоскоор гүйцэтгэх боломж нээгдээд удаагүй байна. Тэгвэл үүний хялбаршуулсан дараагийн шат бол Сангийн яам, Улсын бүртгэлийн ерөнхий газар болон Гааль, татвар, санхүүгийн мэдээллийн технологийн төвөөс хэрэгжүүлж буй Улсын бүртгэлийн ерөнхий газраас үзүүлдэг 38 төрлийн үйлчилгээ, лавлагааны төлбөрийг “Цахим төлбөрийн баримтын систем” буюу ebarimt аппликейшн ашиглан гар утаснаасаа интернет банкаар төлөх боломжтой болсон юм. Энэхүү арга хэмжээг Монгол Улсын Засгийн газрын ээлжит хуралдааны /2019.10.16/ үеэр Монгол Улсын Засгийн газрын гишүүн, Сангийн сайд Ч.Хүрэлбаатар, Улсын бүртгэлийн ерөнхий газрын дарга Б.Баасандорж, Гааль, татвар, санхүүгийн мэдээллийн технологийн төвийн дарга Т.Батбилэг нар танилцуулсан юм.

Ингэснээр Улсын бүртгэлийн байгууллагаас үзүүлж буй бүхий л үйлчилгээний төлбөрийн хураамжийг гурван хувилбараар төлөх боломж нээгдээд байна. Үүнд, өөрийн биеэр банканд дугаарлан цаасан баримт авах, “Гэрэгэ” киоскоор өөртөө үйлчлэх, мөн ухаалаг утсаар гэрээсээ ebarimt аппликейшн ашиглан улсын бүртгэлийн үйлчилгээг авах юм. Еbarimt аппликейшн ашиглан Монгол Улсын аль ч цэгээс үйлчилгээний болон лавлагааны төлбөрийг ухаалаг утсаараа төлснөөр таны мэдээлэл улсын бүртгэлийн нэгдсэн сүлжээнд бүртгэгдэж, өөрийн хамгийн ойр улсын бүртгэлийн нэгжээс регистрийн дугаараараа үйлчилгээгээ авах боломжтой болсноороо давуу талтай юм.

Албан томилолтын үеэр УБЕГ-ын дарга Б.Баасандорж болон бусад албаны хүмүүс Хэнтий аймгийн Засаг дарга Н.Ганбямбатай уулзаж, тус аймагт нэвтрүүлж буй шинэлэг технологи болоод Улсын бүртгэлийн байгууллагаас үзүүлж буй үйлчилгээний талаар танилцуулсан юм. Хэнтий аймгийн Засаг дарга Н.Ганбямба уулзалтын үеэр хэлсэн үгэндээ, Улсын бүртгэлийн ерөнхий газраас технологийн дэвшлийг тэргүүн зорилго болгон ашиглаж, төрийн үйлчилгээг иргэдэд шуурхай хүргэж буйд талархаж байгаагаа илэрхийлэв.

Эх сурвалж: УБЕГ