Удахгүй ес эхэлнэ. Өвлийн хүйтэнд автобус хүлээнэ гэдэг нийслэлчүүдийн хувьд үнэхээр том бэрхшээл. Нийтийн тээврийн хүчин чадал хүрдэггүй юу, аль эсвэл замын түгжрэлээс хамаарч зарим чиглэлийн автобусыг 30 минутаас нэг цаг хүлээж байна.

Энэ асуудлыг бид өчигдөр сурвалжиллаа. Зурагтын шинэ эцсийн автобусны буудалд очиход иргэд зорчих автобусаа хүлээж, удаан хүлээсэн нэг нь цухалдсан байдалтай байв. Харин хүүхэд багачууд даарч, ээж аав нь "Автобус ирэх болж байна уу" гэдгийг гар утаснаасаа хараад зогсож байлаа. Энэ бол Улаанбаатар хотын автобусны зогсоолболгонд байдаг дүр зураг. Зарим автобус зорчигч нь дүүрчихээр буудал дээр зогсохгүй шууд явдаг. Автобусандаа сууж чадаагүй иргэд дараачийнхийг нь хүлээдэг. Дараагийн автобус ирэхэд хүмүүс дахиад л багталцахгүй бужигнаж, жолооч "Хойшоо яваад өг. Зай харагдаад л байна. Хүн бүр л ажилдаа явах гээд яарч байгаа шүү дээ. Одоо хоёрхон хүн" гэсээр арай чүү чихэж оруулаад хаалгаа хааж чадахгүй хөдөлж байна.

Автобусны буудалдээр зогсож байсан иргэд автобус оройтож ирснээс ажлаасаа хоцрох, даарах, тэр ч байтугай осгох шахаж байгаагаа хэлж байв. Ямар нэгэн аргаар багтаж суухгүй л бол дараагийн автобусыг хүлээх шаардлагатай болдог гэдгийг ч хэлж байна.

Зорчигчдоос нийтийн тээврийн хүрэлцээ, хүртээмжийнталаар тодруулахад Өглөө оройн цагаар үнэхээр хэцүү байна. Зурагтын шинэ эцсийн автобусны буудал дээр Баянхошуу, Зүүн салаа, Баруун салаа, Яармаг, Хороолол чиглэлийн автобуснууд явдаг боловч бүгд ирдэггүй. Удаан хүлээдэг. Өглөө гэрээс 7 цагт гаргахгүй бол автобусандаа сууж чадахгүй. "Баруунсалаа-Халдварт" чиглэлийн автобус барагтай бол ирэхгүй. Ирсэн автобусанд багтаж сууж чадахгүй. Иймээс гэрээсээ эрт гарч ажилдаа явдаг. Одоо өвлийн улирал болж байгаа юм чинь нийтийн тээврийн автобусаа нэмэгдүүлэх хэрэгтэй гэдгийг хэлж байв.

Хүйтний эрч чангарч байгаа энэ үед автобусаа нэмэгдүүлэх хэрэгтэй

Иргэн Л.Нямсүрэн "Нийтийн тээврийн зовлон үнэхээр хэцүү байна. Өглөө ажилдаа явж, орой гэртээ ирнэ гэдэг бол үнэхээр хэцүү. Энэ асуудал нийтийн тээврээр явдаг бүх хүнд тулгарч байгаа. Автобус ирэхгүй удахаар нийтийн тээврийн лавлах 326352 утас руу залгахаар утсаа авахгүй. Тэр лавлах утас бараг ажилладаггүй байх. Худлаа утас тавиад ард иргэдийг хуурч байгаа юм шиг санагддаг. Нийслэлийн иргэдийн ихэнх нь автобусаар ажилдаа явдаг байх. Одоо хүйтний эрч чангарч байгаа энэ үед автобусаа нэмэгдүүлэх хэрэгтэй. Дулааны улирал байсан бол өглөө оройдоо алхаж болно. Ид хүйтнээр автобусанд суухаас өөр арга байхгүй байна" гэв.

Манай чиглэлийн автобусыг бараань харагддаггүй "Баруун салаа" гэсэн нэртэй

Иргэн Б. Мандах "Баруун салаа- Халдварт" чиглэлийн автобус маш их хүлээлгэдэг. Их цөөхөн явдаг юм шиг байна лээ. Автобус дотор шахцалдаж, хажуугаар зөрсөн хүмүүс нэгнийгээ түлхэж бага зэргийн хэрүүл болно. Өглөө оройд автобусанд явган хэрүүл тасардаггүй. Дээрээс нь агааргүй. Зуун айлаас Зурагт чиглэлд "Баруун салаа-Халдварт"-ын чиглэлийн автобус явдаг. Энэ чиглэлийн автобус үнэхээр бага. Ямар сайндаа бараань харагддаггүй "Баруун салаа" нэртэй байх вэ. Нийтийн тээврийнхээ үйлчилгээний чанарыг сайжруулъя гэвэл аль болох гэр хорооллын чиглэлүүдэд автобусны тоог нэмэх, үгүй бол түгжрэлээ багасгах хоёр арга байгаа. Угтаа бол автобус хүрэлцээгүйдээ биш түгжрэлээс болоод л явахгүй, олдоц муу байна" гэдгийг хэлж байна.

Өнөөдөрнийслэлийн 93 чиглэлд 860 тээврийн хэрэгсэл иргэдэд үйлчилж байна

Өнөөдрийн байдлаар Улаанбаатарын 93 чиглэлд 860 тээврийн хэрэгсэл иргэдэд үйлчилдэг. Цагийн хуваарийн дагуу 06.00-23.00 цаг хүртэл үйлчилгээ үзүүлдэг юм байна. Ерөнхийдөө автобусны дундаж хүлээлт 9-10 минут байдаг. Авто замын түгжрэлээс шалтгаалж, зарим тохиолдолд хүлээлт үүсч байгааг үгүйсгэхгүй. Дундаж хүлээлтийн хугацааг арван минутаар тавьж өгсөн хэдий ч авто замын түгжрэл маш их нөлөөлдөг. Хэдий тухайн чиглэлд олон автобус тавьж өгдөг ч зам түгжрэлтэй бол автобус зогсож байна гэсэн үг юм. Тэгэхээр зохицуулалтын өөр арга хэмжээ авах шаардлагатайг албан хүмүүс хэлж байна.

...Өнөөдөр Улаанбаатарт 89 чиглэлд 860 тээврийн хэрэгсэл иргэдэд үйлчилж байгаа ч 1.3 сая гаруй хүн амтай нийслэлийнхэнд хүрэлцэхгүй байна. Нийтийн тээврийн үйлчилгээг хариуцдаг байгууллага нь судалгаанд үндэслэн, урсгалыг зохицуулж байгаа гэх боловч бодит байдал дэээр автобусыг 30, 40 минутаар хүлээдэг. Зарим чиглэлийн автобусыг нэг цаг хүлээж байна.

Мөн нийтийн тээврийг гомдлыг хүлээж авдаг 326352 утас руу залгахаар авдаггүй. Түүнчлэн нийтийн тээврийн үйлчилгээнд явж буй автобуснуудын ихэнх нь арваас дээш жил явсан тул ашиглалтын хугацаа нь дууссан. Хотын удирдлагууд парк шинэчлэл хийнэ гэж хэлж байгаа боловч бодитоор хийсэн зүйл байхгүй байна. Иймээс хар утаа хаядаг автобус ч үйлчилгээнд явахаас аргагүй. Өнгөрсөн оны энэ үед нийслэлд 89 чиглэлд 945 автобус үйлчилж байсан бол өнөөдөр 93 чиглэлд 860 болтлоо буурчээ. Өөрөөр хэлбэл, нийслэлчүүдийн хэрэгцээнд нийцүүлэн автобусны тоог нэмэгдүүлэхгүй бол энэ өвлийг давахад тун хүнд байна.