УИХ-ын гишүүн О.Баасанхүү твиттер хуудсаараа дамжуулан “МИАТ” компанитай холбоотой ноцтой мэдээллийг олон нийтэд дэлгэсэн юм. Тэрбээр “Улаанбаатараас-Берлин чиглэлд ниссэн “МИАТ” компанийн онгоцны нисгэгч нар хар тамхи хэрэглэсэн байсан” гэх мэдээллийг жиргэсэн. МАН-ын зовлон Манай л зовлон юм даа. Гэтэл МИАТ-ийн зовлон бас Манай л зовлон болж. Онгоц барьдаг согтуу нисгэгч гэж дуулаад айдаг байсан бол сүүлдээ хар тамхичин нисгэгчтэй болсон гэх. Үнэн үү, сайд аа дуугараач та. Үгүй бол ЕС-аас асуух уу. Дуугүй байна гэдэг та өөрөө яг хэн бэ” гэжээ. УИХ-ын гишүүн О.Баасанхүүгийн жиргээний дараа МИАТ-ийн нисгэгчид хар тамхи хэрэглэж Берлинд баригдсан нь тодорхой болсон юм.

МИАТ компани хоёр нисгэгчид хариуцлага тооцож, хөдөлмөрийн гэрээгээ цуцалжээ

Энэ асуудлаар МИАТ компани хоёр нисгэгчийнхээ хөдөлмөрийн гэрээг цуцалсан талаар МИАТ ТӨХК-ийн Нислэгийн үйл ажиллагааны ерөнхий менежер, ерөнхий нисгэгч Ч.Нямсайхан хэвлэлд мэдээлэл өгсөн.Тэрбээр "Нисгэгч согтууруулах ундаа болон мансууруулах бодис хэрэглээд нислэгт гарах ямар ч боломж байхгүй. Нисгэгч нар тогтмол эмчийн үзлэгт хамрагддаг. Энэ хариуцлагатай ажлыг согтууруулах ундаа болон мансууруулах бодис хэрэглэсэн үед гүйцэтгэх боломжгүй гэдгийг хариуцлагатайгаар хэлмээр байна. Мөн олон улсын нисэх буудлууд аюулгүйн үзлэгийг хийж, согтууруулах ундаа, мансууруулах бодисын тест аваад явуулдаг. Берлинд болсон үйл явдалтай холбогдуулан хоёр нисгэгчид хариуцлага тооцож, хөдөлмөрийн гэрээгээ цуцалсан. Нэг нисгэгч нь согтоод буудлын өрөөндөө унтсаны улмаас ус алдсан талаарх мэдээллийг манай Берлин дэх төлөөлөгчийн газраас өгсөн. Тиймээс Европт дадлага хийгээд буцаж явсан нисгэгч нарт томилолт үүрэг өгч, нислэг хуваарийнхаа дагуу хийгдсэн. О.Баасанхүү гишүүний яриад байгаа шиг нислэг хойшилсон зүйл огт байхгүй" гэжээ.

Манайд улсад хар тамхины хэрэглээ хэрээс хэтэрч төрийн албанд ажиллаж байгаа дипломатчид хар тамхи хэрэглэж эхэлсэн. Үүний араас дуучид мөн л хар тамхи хэрэглэж, гавтгай зугтсан асуудал гараад удаагүй байгаа. Одоо нисгэгчид араас нь нисээд ороод ирлээ.