Эдийн засагч Л.Наранбаатарт залилуулсан гэх иргэн М.Ариунтулга өнөөдөр сэтгүүлчдэд мэдээлэл өглөө.

Эдийн засагч Л.Наранбаатар залилан үйлдсэн нь шүүхээр тогтоогджээ

Иргэн М.Ариунтулга: “Сүүлийн таван жилийн хугацаанд 3-4 удаа шүүхээр орлоо. Баянгол дүүргийн Эрүүгийн хэргийн анхан шатны шүүх хурал өчигдөр болсон. 14 цагийн орчим захирамж гарч, Эдийн засагч Л.Наранбаатарыг гэм буруутайд тооцон ял оноосон. Миний бие гадаад улсад суралцаж эх орондоо ирээд арав гаруй жил болж байна. Үүнээс есөн жилийн хугацаанд Л.Наранбаатар гэдэг хүнд залилуулж, дээрэмдүүллээ. Нэг үгээр есөн жил энэ хүний араас хөөцөлдөж, таван жил хуулийн байгууллага нь энэ хэргийг шалгалаа. Өчигдөр Баянгол дүүргийн Эрүүгийн хэргийн анхан шатны шүүх шийдвэрээ гаргалаа. Хамгийн инээдтэй нь таван жилийн турш намайг доромжилж, залилчихаад тэр хүний авсан ял нь 20 сая төгрөгийн торгуулийн ял байсан юм. Надад өгөх ёстой 884 сая төгрөгийг банкинд хадгалуулж, таван жилийн турш ердөө хүүг нь авахад 400 гаруй сая төгрөг болж байгаа юм. Түүний 20-хон сая төгрөгөөр шүүх ял оногдууллаа. Шүүх гэдэг завхарчихсан юм байна. Шударга бусын хонгилын шүүхээр нь би олон удаа орлоо. Залилан хийсэн Л.Наранбаатартай Эрүүгийн болон Иргэний шүүхээр 3-4 удаа орж байна. Асар их мөнгөний эрх мэдэлд хүрчихсэн, хуулийн байгууллагыг худалдаад авчихсан ийм хүмүүсд хонгил гэж байхгүй. Л.Наранбаатарын залилангийн хэргийг таван жил шалгачихаад өгсөн ял нь 20 сая төгрөг.

Шүүгч "Та энэ хүний хохирлыг барагдуулах уу?" гэж асуухад шууд "Өгөхгүй" гэсэн. 20 сая төгрөгийн ялыг их гоё тайлбарласан. “20 сая төгрөгөө тодорхой хугацаанд улсдаа хувааж өгөөрэй. Та нийгэмд аюул учруулах хэмжээний хүн биш учир 20 сая төгрөгийн торгуулийн ял өгч байна” гэсэн. Үүнд сэтгэгдэл маш дундуур байна. Шүүх бол үнэхээр сүйрчихсэн газар юм байна” гэлээ.

Л.Наранбаатарыг хорьсон талаарх мэдээлэл ор үндэсгүй, худал гэв

Түүнчлэн хэвлэл мэдээллийн зарим хэрэгслээр Л.Наранбаатарыг хорьсон талаарх мэдээлэл цацагдсан нь ор үндэсгүй, худал болохыг онцлов. Тэрбээр, “Л.Наранбаатар өчигдөр 14.30 цагийн үед өөрийн жиргээндээ "Шударга бусын хонгилоор орох боллоо" хэмээн өөрийгөө гэм буруугүй байтал хоригдсон мэтээр олон нийтэд мэдээлсэн. Гэтэл тэр хүнийг хориогүй, намайг хохироосон хэмээн шүүх дүгнэж 20 сая төгрөгөөр торгосон шүү дээ. Миний хохиролыг барагдуулж өгөөч гэж хэлснийхээ төлөө таван жилийн турш хууль хяналтын бүх байгууллагаар явж, өөрөө ч шалгуулсан. Мөнгөтэй хүн бүгдийг авчихсан байдаг юм байна. Хууль, хяналтын байгууллага гэж нэрлэгддэг нэгээс бусад бүх байгууллагаар дамжлаа. Одоо би дахиж чимээгүй суухгүй. Дараа дараагийн баримтуудыг дэлгэж тавина. Миний хандсан хуулийн байгууллагуудад энэ хүн ямар нөлөөтэй байдаг, мөнгөтэй хүн яаж харьцдаг, намайг яаж дарамталдаг вэ гэх мэт баримтууд байгаа. Яг үнэнийг хэлэхэд би айж байна. Энэ том компаний захирал хууль, хяналтын байгууллагад ямар хүчтэй байдгийг нь мэддэг болсон. Энэ хүнээс эрүүл мэндийнхээ хувьд айж байна. Гэхдээ шүүхийн шийдвэрээр миний зөв гэдэг нь тогтоогдсон учраас үүнийг хэлж байна. Таван жилийн турш шүүхээр явахдаа нэг л зүйлийг ойлголоо. Өнөө цагийн хамгийн адгийн шаар, луйварчдын эцсийн орогнох газар нуугдах үг нь эх орон, ард түмэн болжээ. Ингэж орилж байгаа хүмүүсийн цаана энэ мэт луйварчид залилан хийгээд сууж байна” гэв.