Сүхбаатарын талбайн урд байрлах ”Хонхтой цэцэрлэг”-ийн оронд хөгжимт усан оргилуур барих асуудал маргаан дагуулаад байна. Нийслэлчүүд эдийн засгийн энэ хүнд хэцүү цагт 3.2 тэрбумыг нэн шаардлагатай өөр ажилд зарцуул гэх шүүмжлэлийг хэлсэн. Энэ хүрээнд өчигдөр “Алтан Дорнод Монгол” компанийн захирал Т.Ганболд өөрийн фэйсбүүк хуудаснаа “Жорлонгийнх нь асуудлыг би даая. 3.2 тэрбумаар эмнэлэг барих буюу хэрэгтэй зүйлд зарцуул” гэсэн байр суурийг илэрхийлсэн.

Үүний хариуд хотын хотын дарга С.Амарсайхан өөрийн цахим хуудаснаа “Хот тохижилтын 700 ажилтан 3.2 тэрбум төгрөгийн өртөгтэйгээр хоёр сарын хугацаанд хэрэгжүүлэх Сүхбаатарын талбайн цэцэрлэгийн иж бүрэн тохижилтыг хувийн зардлаараа хийх ажил хэрэгч, бүтээлч санал тавьсан “Алтан дорнод” ХХК компанийн захирал, их хотын иргэн Т.Ганболд танд баярлалаа. Нийслэлийн удирдлагууд бид таны саналыг хүлээж авч байгааг танд уламжилъя” хэмээсэн. Түүнчлэн өдөр мэдээлэл хийх үеэрээ энэ асуудлыг бас хөндсөн.

Хотын дарга С.Амарсайхан: Зардлыг нь гаргаж хийе гэж байгаа энэ иргэний саналыг бид талархалтай хүлээж авч байгаа

Ийм сайхан ажил хэрэгч санал гаргасан иргэн Т. Ганболдод талархаж байгаа. Сошиалаар ийм мэдээ явж байгааг харсан. Манай хэвлэл мэдээллийн албаныхан мэдээлсэн. Албан ёсоор санал ирээгүй байгаа. Хүлээж авч, санал солилцон уулзалдахад бэлэн байгаа. Энэ хүндрэлтэй нөхцөл байдалд хот тохижилтын нийт ажилтан албан хаагчдын хийж гүйцэтгэж байгаа ажлыг цааш нь хэвийн үргэлжлүүлэхийн тулд Төр, хувийн хэвшлийн хэнтэй ч хамтраад ажиллах бүрэн боломжтой. Ялангуяа өөрийн нь санаачлагаар, тэр дундаа байгалийн баялаг гэж ярьдаг алт, нүүрсний уурхайн салбарт үйл ажиллагаа явуулж байгаа уул уурхайн компаниудаас анх удаа Улаанбаатар хотод энэ ажлыг өөрөө хариуцаж, зардлыг нь гаргаж хийе гэж байгаа энэ иргэний саналыг бид талархалтай хүлээж авч байгаа. Ер нь ч нийгмийн хариуцлагын хүрээнд цаашид ийм олон санал санаачлагууд гарах байх гэж найдаж байна. Цаашдаа хуулийн хүрээнд санал солилцоно. Санал солилцоход бэлэн байгаа. Аль ч талаараа төсвийн мөнгийг хэмнэх, олон түмний оролцоог хангах, аж ахуйн нэгжүүдээ дэмжиж ажиллах нь бидний ажлын нэг хэсэг. Мэдээж, хугацаанд нь хэрэгжүүлнэ, хуулийн хүрээнд асуудлыг шийднэ гэвэл бид иргэд, аж ахуйн нэгжүүдэд асуудлаа хамтарч шийдье, ажлаа үргэлжлүүлье, амьдрах орчноо сайжруулья гэж байгаа санаачлагыг баяртайгаар хүлээж авч дэмжинэ. Тэр тусмаа хувийн хэвшлээс анх удаа ийм санал санаачлага гаргаж байгаад баяртай хүлээж авч шийдээх болно.

“Алтан Дорнод Монгол” компанийн захирал Т.Ганболд: Түүн дээр 3,2 тэрбум төгрөгөөр усан оргилуур барьж өгье гэсэн санаа оноо юу ч байхгүй

Төсвийн зарцуулалт нийгмийн шүүмжлэл дунд байнга явж ирсэн. Тэгээд Сүхбаатарын талбайн урд талын цэцэрлэгийн асуудал гарч ирлээ. Өнөөдөр цар тахлын асуудал үүсээгүй байсан бол энэ хүчээр яваад л бага зэрэг эсэргүүцэлтэй тулгараад өнгөрөх байсан байх. Гэтэл өнөөдөр дэлхий даяараа ийм түгшүүртэй, мөнгөний хомсдолтой, эдийн засгийн уналттай байхад ийм тэнэг зардал гаргана гэдэг тун харамсалтай. Бизнес санхүү байтугай, ердийн ойлголтоор ийм хаагдмал нөхцөлд хөрөнгө мөнгөө арай зохистой юманд зарцуулах хэрэгтэй. Дэлхий дахин ийм цаг үед иргэддээ мөнгө тарааж өгч байна шүү дээ, хэдэн тэрбумаар нь. Ахуй амьдралдаа хэрэглэ, хоол ундандаа зарцуул гэж, эдийн засгаа тэтгэх утгаар нь. Гэтэл манайх хаа хамаагүй усан оргилуур ч гэх шиг. Хэрэгцээтэй юм хийгдсэн бол нийгэм тэр аяараа л дэмжинэ. Бид бүгдээрээ л мэдэж байгаа. 2010 оноос эхлээд өнөөдрийг хүртэл үе үеийн хотын дарга нар бүх дүүргийг усан оргилууртай болгоно гээд л баахан угаалга явагдсан шүү дээ. Татвар төлөгчдийн асар их төсвийн мөнгө алга болсон. Одоо энэ дүүргүүдэд ажиллаж байгаа усан оргилуур хэд билээ, ер нь усан оргилуур гэдэг маань юу билээ. Манайх гурван сарын зуны улиралтай, есөн сар нь зогсдог. Нэг удаа нээлтээ хийгээд цаашдаа ашиглагдахгүй цаг агаарын бүстэй газар ийм зүйл хийнэ гэдэг харамсалтай. Иргэд эсэргүүцэж байсан учраас би өнөө өглөө шийдэл гаргах үүднээс арга буюу нэг пост твиттер дээр оруулсан. Одоо байж л байна. Түүн дээр 3,2 тэрбум төгрөгөөр усан оргилуур барьж өгье гэсэн санаа оноо юу ч байхгүй. Харин энэ тэнэглэлээ зогсоочих оо. Ядаж нийгмээрээ хямарчихсан байгаа цар тахлын үед зогсоочих гэсэн. Өөрөө энэ хагас бүтэн сайнд биеийн тамирын хувцастай яваад л жорлонгийн зураг үзүүлж байна лээ. Төв талбайд нь жорлон нь эвдэрчихсэн, шугам сүлжээ нь болохгүй, бохир нь хальчихсан байгаа бол би тэр шугам сүлжээг нь солиод, жорлонг нь шинэчлээд сайхан болгочихьё. Яриад байгаа мөнгөнөөс нь хэд дахин багаар болгочихьё гэсэн санаа байгаа юм. Гэтэл дургүйд хүчгүй гэж байгаа юм уу, эсвэл өөрөө ойлгоогүй юм уу, нэг тийм утгагүй хариу тавьсан байна лээ. Ашгүй, ашгүй та одоо 3,2 тэрбумаар манай хоёр сар хийгдэх төслийг санхүүжүүлэх гэж байгаа юм байна. Тэгээч тэгээч гэсэн даапаалаад байгаа юм уу, ёжлоод байгаа юм уу. Аль эсвэл хийхгүй гэсэн юмаа ийм зүйлээр аргалах гэж байгаа юм уу, тийм нэг явуургүй муухай арга харагдаж байна лээ. Өөрөө яг бичсэн үгүйг нь мэдэхгүй. Өөрийнхөө фейсбүүк хуудсан дээр тавьсан байна лээ. Харин түрүүнд телевизээр мэдэгдэл хийхдээ арай өөр өнцгөөр ярих шиг болсон.

Дахиад хэлэхэд, миний санаа бол гологдоод байгаа энэ цэцэрлэгийг аятайхан засаж янзлаад, ногоон байгууламжийнх нь өнгө төрхийг сайжруулаад, жорлонг нь олон улсын стандартад нийцүүлээд, ариун цэврийн шаардлага хангах хэмжээнд инженерийн шугам сүлжээтэй болгоод, гэрэлтүүлгийг нь янзалчихъя л гэж байгаа юм. Түүнээс биш, эдний хийчихсэн зураг төсөл, 3,2 тэрбум төгрөг гэдэг утгагүй үнэ тавьчихсан зүйлийг дэмжээгүй.

Н.Саранчимэг