Энэ жилийн Үндэсний их баяр наадмыг “13 дугаар зуун цогцолбор”-т үзэгчгүйгээр зохион байгуулах гэж буй. Тэгвэл яг одоо Наадмын бэлтгэл ажлын талаар Нийслэлийн Засаг дарга бөгөөд Улаанбаатар хотын Захирагчийн үүрэг гүйцэтгэгч Ж.Батбаясгалан мэдээлэл хийж байна.

Тэрээр "Энэ жил цар тахлын улмаас нийтэд үйлчлэх үйлчилгээ үзүүлэх боломжгүй. Ямар нэг үйлчилгээ зохион байгуулахгүй гэдгийг албан ёсоор мэдэгдэж байна. Телевизийн суваг, олон нийтийн сүлжээгээр шууд дамжуулан хүргэнэ. Дэлхийд ганцхан байдаг Монгол наадмыг олон улсын хэмжээнд үзүүлэхээр зорьж байна. Цар тахал нэг талдаа хүндрэл болж байна. Нөгөө талдаа цар тахал давуу талыг мөн үүсгэж байна.

Тиймээс бид холбогдох байгууллагаас гаргасан зөвлөмж, дэглэмийн дагуу наадмыг зохион байгуулна.

Шагнал, урлаг соёл, тохижилт үйлчилгээ, аюулгүй байдлыг хангах, ард иргэдэд хүргэх зэрэг үйл ажиллагаанд зардал гарч байна. Энэ наадмыг зохион байгуулж буй ажилтнууд сар орчим хугацааг зарцуулж байна.

Үндэсний их баяр наадмыг хуулийн дор зохион байгуулдаг. 2020 оны Наадмыг 3,0 тэрбум төгрөг зарцуулахаар төлөвлөсөн. Тус ажлыг есөн салбар хорооноос зохион байгуулдаг. Цар тахлын үед ариутгал, халдваргүйжүүлэлтийн ажлыг зохион байгуулахаар журамласан. Үүнийг хийхэд тодорхой зардал гарч байна. Дэлхийд ганцхан Монгол наадмаа, энэ уламжлалыг дэлхий дахинд танилцуулахын тулд нэг сарын хугацааг зарцуулж байна. Баяр наадамд оролцож буй хүмүүсийн бай шагналыг баталсан" гэлээ.

Үндэсний бөхийн барилдаанд 800, шагай, сурын харваанд 1000 гаруй хүн оролцдог. Мөн үүнд хурдан морины уралдаанд оролцогчид нэмэгдэнэ. Эрсдэлээ тооцож үзвэл бүх арга хэмжээг Хүй долоон худагт зохион байгуулахад хэтэрхий их хүмүүсийн бөөгнөрөл үүснэ. Үүнээс сэргийлж “13 дугаар зуун цогцолбор”-т тусгай төлөвлөгөөний дагуу наадмыг зохион байгуулн гэж наадмыг зохион байгуулагчид мэдээллээ.