Засгийн газар, эрх баригчид тэтгэвэр, тэтгэмжийг нэмэх талаар мэдэгдлээ. Гэвч дараахан нь үнийн өсөлт чих дэлсэж, зүрх балбуулдаг. Эдийн засгийн тогтолцооны ийм гаж уруудалт, урвуу байдал сүүлийн жилүүдэд үргэлжиллээ. Үнийн өсөлтөд үхэр мэт дөрлүүлээд дарлуулж суугаа хэдэн монголчууд өдөр ирэх тусам талх таллаж, тариа будаагаа тоолох шахаж байхад ямбатнуудын цөлмөсөн баримт цувсаар. Ард түмний амьжиргааны гол эх үүсвэрүүдийг дурдвал хувийн бизнесүүдийн тогтмол хөлс, төрийн албаныхны шатлалтай ялгаварлалтай цалин, наймаа арилжаа, жижиг гар үйлдвэрлэл сар, өдрийн орлогоороо хүнс, хэрэглээгээ аргацаасан амьдрал гэх маягаар бүдүүн баараг хуваан авч үзээд тэтгэвэр тэтгэмж авдаг хэсгийнхэн нийгмийн халамжид хамрагдахаас өөр гарцгүй ангилалд багтана.

Хөгжиж буй орнуудын нийгмийн байдал ерөнхийдөө төстэй дүр зураг ажиглагддаг ч Монголын хувьд авлигалын хор хөнөөлд идэгдэж, улс төрчид нь мэргэшсэн хулгайч, гаршсан луйварчин байгаа нөхцөлд тэтгэвэр нэмээд ч зорилтод бүлэгт эерэг нөлөө үзүүлж чадахгүйдээ. Эрх баригч намынхан сонгуулийн улайралд автаж арай гэж нэмэх үзүүлэлт рүү эргэсэн эдийн засгаа ухаалаг бодлогоор баримжаалалгүй халамжийн бодлогоор аргацаахаар ханцуй шамлав.

Аливаад ялагдахын айдсаар хандсаар байгаа зарим нотолгоо нь сөрөг хүчний байр суурийг ямагт өөрсдийн талд ашигтайгаар илэрхийлэх үйлдлүүдийг төрийн хүнд механизмаар үйлдсээр ирснээс харж болно. Тухайлбал саявтар Ардчилсан нам сошиал орчинд үнийн өсөлт, тэтгэвэр тэтгэмжийн хүрэлцээгүй байдлыг харуулсан контент түгээгээд эхлэхээр МАН асуудлыг дор нь шийддэг идтэн болох гэж сандарч байгаагаас зарим дүгнэлтүүдийг шууд хийж болохоор. Лангуун дээрх барааны ханш ба тэтгэврийн зөрүү, үнийн өсөлт гурав мөнхөд зөрчилдөж нэг нь эерэгжихээр нөгөө нь буурдаг байдлыг ухаалгаар засах наад захын менежмент бодлого хөтөлбөр дутагдаж байгаа нь туйлын доройтол мөн.