УИХ-ын чуулганы нэгдсэн хуралдаанаар Ашигт малтмалын тухай хуульд нэмэлт оруулах тухай хуулийн төслийн хэлэлцэх, эсэх асуудлыг хэлэлцэж байна. Энэхүү хуулиар төр стратегийн орд газраас хувь эзэмших, эсвэл эзэмших хувьтайгаа дүйцэхүйц хэмжээний роялти татвар авах хоёр сонголтыг бий болгож байгаа юм. Өчигдөр байнгын хорооны хуралдаан дээр эдийн засаг тогтворгүй энэ цаг үед урьдны туршлага болох Оюутолгойн 34 хувийг эзэмшиж байснаасаа сургамж авч энэ удаад Гацууртын ордоос 20 хувийг эзэмших нь эрсдэл багатай хэмээн үзэж Гацууртын ордын 20 хувийг төр эзэмшихийг дэмжсэн юм.

Гацууртын орд эдийн засгийн эргэлтэд орсноор улсын төсөвт төлбөр, татвар хураамжаар орлого оруулахаас гадна ордыг ашиглах компанид төр хувь эзэмшсэнээр ногдол ашгийн хувиар орлого хуваарилагдаж, энэ орлого улс орны хөгжилд зарцуулагдана гэж үзэж байгаа. Гацууртын ордын тусгай зөвшөөрөл эзэмшигч “Сентерра гоулд Монголиа” ХХК-ийн хувьд хамтарсан “Эрдэнэс-Гацуурт” ХХК байгуулагдсанаар төрийн оролцоотой үйл ажиллагаа явуулах зохион байгуулалтад шилжих асуудлыг Ашигт малтмалын тухай хуулийн 5 дугаар зүйлд заасны дагуу Орд ашиглах гэрээ байгуулах замаар шийдвэрлэх боломжтой гэж Засгийн газар үзээд байгаа.

Т.БАТСҮРЭН