Голомт банк нь харилцагчдынхаа хэрэгцээ шаардлагад бүрэн нийцсэн, банк санхүүгийн шилдэг үйлчилгээг хүргэх зорилтынхоо хүрээнд Канадын Экспорт Хөгжлийн Агентлаг (Export Development Canada)-тай дунд хугацааны санхүүжилтийн гэрээг 2015 оны 03 дугаар сарын 19-ний өдөр байгууллаа. Ингэснээр Канад Улсаас газар тариалан, уул уурхай, боловсруулах үйлдвэр зэрэг салбараас тоног төхөөрөмж, бүтээгдэхүүн, үйлчилгээ импортолдог бизнес эрхлэгчдэд хөнгөлөлттэй нөхцөлөөр дунд хугацааны зээлийн санхүүжилт авах боломж нээгдэж байгаа юм. Энэхүү гэрээг Голомт банкны Хөрөнгө оруулалтын газар хариуцсан Тэргүүн дэд захирал Л.Болормаа болон Канадын Экспорт Хөгжлийн Агентлагийн Бүсийг хариуцсан ахлах менежер Леонид Элиссев нар үзэглэсэн байна.

Канадын Экспорт Хөгжлийн Агентлагийн Бүсийг хариуцсан ахлах менежер Леонид Элиссев хэлэхдээ: “Бид Монгол Улсад анх удаа дунд хугацааны санхүүжилтийн гэрээ байгуулж байна. Монголын хөдөө аж ахуй, уул уурхайн салбарт Канадын техник, технологийг өргөнөөр ашигладаг бөгөөд тэдгээр аж ахуйн нэгжүүд Голомт банкнаас хөнгөлттэй нөхцөлөөр зээл авах боломжтой болж байгаад баяртай байна” гэжээ. Мөн энэ сарын 17-ны өдөр Голомт банк, Унгарын Үндэсний Худалдааны Төлөөлөгчийн Монгол дахь салбар болох “Мажаар Трейд Хаус” ХХК-тай хамтран, Унгар Монголын бизнес эрхлэгчдийн хамтын ажиллагааг өргөжүүлэх, худалдааны харилцааг нэмэгдүүлэх, хэрэгжиж буй төсөл хөтөлбөрүүдийг дэмжих зорилтын хүрээнд хамтын ажиллагааны гэрээг байгуулсан юм. Уг гэрээнд Голомт Банкийг төлөөлж Хөрөнгө Оруулалтын Банк хариуцсан Тэргүүн Дэд Захирал Л.Болормаа, “Мажаар Трейд Хаус” ХХК-ийг төлөөлж Ерөнхий Захирал Ризак Шандор нар гарын үсэг зуржээ.