Дэлхийн цомоос багаараа хүрэл медаль хүртлээ
ОХУ-ын Санкт-Петербург хотын Гагариний өргөн чөлөөн дэх Спорт-концертын цогцолборт чөлөөт бөхийн эмэгтэйчүүдийн шилдэг найман баг оролцдог Дэлхийн цомын тэмцээн гуравдугаар сарын 7-8-ны өдрүүдэд зохиогдож өчигдөр өндөрлөв. Дэлхийн цомын төлөө эмэгтэй багуудын тэмцээний хүрэл медалийн төлөө Монгол, АНУ-ын багуудын барилдаан сонирхолтой, өрсөлдөөнтэй боллоо.
Манай баг нэг барилдаанд ялж хоёр барилдаанд ялагдсан ч дараагийн 4 барилдаанд завсаргүй ялалт байгуулж хүрэл медаль авах болзол хангаж чадсан юм. Шийдвэрлэх барилдаанд Гавьяат тамирчин О.Насанбурмаа шийдэмгий барилдаж өрсөлдөгчөө 8:5 онооны харьцаагаар буулгаж авсан нь ялалтын уухайг хадаалаа.
Монгол, АНУ-ын багуудын барилдааны дүн
48 кг Э.Нарангэрэл - Алиса Лампе, 8:10
53 кг Э.Сумьяа - Уотнер Кондер, 4:2
55 кг С.Бямбацэрэн - Хэлэн Луис Марилиус, 1:2
58 кг Б.Шоовдор - Алли Маркензи Раган, 10:0
60 кг С.Цэрэнчимэд - Кеслей Рене Кэмпэлл, 12:1
63 кг С.Батцэцэг - Эрин Элизабет Кложо, 11:2
69 кг О.Насанбурмаа - Елена Пирожкова, 8:5
75 кг Г.Наранчимэг - Аделина Грей, 0:10
Ийнхүү манай эмэгтэй баг Дэлхийн цомын төлөө тэмцээнд 7 дахь удаа оролцохдоо хүрэл медаль хүртлээ. Өмнө нь 2013 онд эх орондоо болсон Дэлхийн цомын төлөө тэмцээнд мөнгөн медаль авч байсан юм.
Д.ТҮВШИН
Сэтгэгдэл