Залуу сагсан бөмбөгчид эхний хожлоо авлаа
Монголын сагсан бөмбөгийн залуучуудын шигшээ баг нөхөрсөг тоглолт хийхээр Эрхүү хотыг зорьсон билээ. Тэд эхний тоглолтоо Эрхүү хотын хоёрдугаар шигшээ багтай хийж, 59:50 онооны харьцаагаар хожсон байна.
Түүнчлэн өнөөдөр Улаанбаатарын цагаар 17 цагаас Политехникийн их сургуулийн багтай тоглоно. Эрхүү хотноо болж буй энэ нөхөрсөг тоглолт манай баг тамирчдын дараа дараагийн тэмцээнүүдэд туршлага болж байна гэж эх сурвалжууд мэдээлэж байна. Учир нь “Универсиад 2015” наадамд манай баг топ багуудтай нэг хэсэгт багтсан байна. БНСУ-ын Гванжу хотноо ирэх долдугаар сард Дэлхийн оюутны Универсиад 28 дугаар наадам болно. Монголын оюутны спортын холбоо энэхүү наадамд 12 төрөлд 200 гаруй хүний бүрэлдэхүүнтэй оролцох юм. Манай сагсанбөмбөгийн эрэгтэй баг ОХУ, Монтенегро, Швед, Канад, Мексикийн шигшээ багуудтай нэг хэсэгт багтжээ.
Б.ГЭРЭЛ
Сэтгэгдэл