Үхэр, хонины махыг Хятадын зах зээлд экспортлох асуудлаар Хөх хотод ажиллав

Д.Тулга / Эдийн засаг

Энэ сарын 18,19-ний өдрүүдэд ХХАА-н дэд сайд Б.Батзоригоор ахлуулсан ажлын хэсэг Хятад улстай хөдөө аж ахуйн салбар дахь хамтын ажиллагаагаа өргөжүүлэх, харилцаагаа шинэ шатанд гаргах, мах, махан бүтээгдэхүүн тэр дундаа үхэр, хонины мах болон улаанбуудай, тосны ургамлыг Хятадын зах зээлд экспортлох асуудлаар ӨМӨЗО-ны Хөх хотод ажиллалаа.

БНХАУ-ын дарга Си Зиньпин 2014 онд Монгол улсад айлчлах үеэр Монголд үйлдвэрлэсэн хөдөө аж ахуйн гаралтай бүтээгдэхүүнийг Хятадын зах зээлд татваргүй, хэмжээ харгалзахгүй экспортлох манай талын саналыг дэмжсэн билээ. Тэрбээр газар зүйн байршлын давуу талыг ашиглан үхэр, хонины махыг Монголд боловсруулж, нэмүү өртөг шингээн, татваргүйгээр хэмжээ харгалзахгүй Хятад улс руу экспортлох, үүнд дэмжлэг үзүүлэхэд бэлэн гэдгээ илэрхийлж байсан юм.

Айлчлалын эхний өдөр дэд сайд Б.Батзориг Хөх хотын Хөдөө аж ахуйн танхимын дэд дарга Бүрэнтэй уулзсан бөгөөд хоёр орны хөдөө аж ахуйн гаралтай бүтээгдэхүүний худалдааг хөнгөвчлөх, хамтын ажиллагаагаа өргөжүүлэх асуудлаар санал солилцсон юм. ӨМӨЗО-ны хувьд 28 сая хүн амтай, 100 сая малтай бол манай улс 3 сая хүн амтай, 51,9 сая малтай, энэ давуу талаа ашиглан нөхөн сэргээгдэх уг баялгаа эдийн засгийн эргэлтэд оруулах боломж байгаа юм.

Айлчлалын хүрээнд ӨМӨЗО-ны Дэд тэргүүлэгч Юн Гуанжүнтэй уулзаж ”Мал аж ахуй, газар тариалангийн гаралтай бүтээгдэхүүнийг Хятадад экспортлохоос гадна ӨМӨЗО-ны эрчимжсэн мал аж ахуйг Монголд нутагшуулах, техник технологийн дэвшлийг нэвтрүүлэх,энэ талын мэргэшсэн боловсон хүчин бэлтгэж сургахад дэмжлэг үзүүлэх, малын халдварт өвчний оношлогоо, судалгааны чиглэлээр мэргэжилтнүүдийг Хятадын лаборатори, хүрээлэнд дадлагажуулах зэрэгт дэмжлэг үзүүлэх “ саналыг тавьсан юм. Дэд тэргүүлэгч Юн Гуанжүн болон холбогдох албаныхан манай саналыг нааштайгаар хүлээн авч, бүхий л талаар дэмжин ажиллана гэдгээ илэрхийлэв.

Мөн ӨМӨЗО-ны Хяналт шалгалт, хорио цээрийн газрын дарга Жан Шао Тонгтой уулзаад хоёр орны гадаад худалдааг хөнгөвчлөх үүднээс хилийн боомтуудын дэд бүтцийг сайжруулах, хорио цээрийн бичиг баримтын нөхцлийг ижилсүүлэх, бүтээгдэхүүний тухай нэгдсэн цахим сантай байх мөн боомт дээр тээврийн хэрэгсэлд халдваргүйжүүлэлт хийх тоног төхөөрөмж суурилуулахад хөрөнгө оруулж хамтран ажиллах саналыг тавьсан байна.

Айлчлалын хүрээнд Монгол, Хятадын мах, махан бүтээгдэхүүний бизнес эрхлэгч аж ахуй нэгжүүдийн ажил хэрэгч уулзалт болжээ.

Энэ удаагийн уулзалтад Монголын махны холбоо, мах, махан бүтээгдэхүүн үйлдвэрлэгч, мал аж ахуйн бизнес эрхлэгчдийн төлөөлөл болох 15 томоохон аж ахуй нэгжийн 40 орчим төлөөлөгч, Хятадын махны холбооны гишүүн үйлдвэрүүд, махны бизнес эрхлэгчид, Монголд хөрөнгө оруулах сонирхолтой нийт 100 гаруй төлөөлөгч оролцож, өөрсдийн нэрийн бүтээгдэхүүнээ танилцуулсан байна.

Ж.МАРАЛ


Сэтгэгдэл


0 сэтгэгдэл байна
1000 тэмдэгт оруулах үлдлээ.
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
0 сэтгэгдэл байна
Уншигчдын бичсэн сэтгэгдэлд Medee.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.