Тавантолгойн хөрөнгө оруулалтын гэрээний төсөлд дүгнэлт гаргах УИХ-ын гишүүдээс бүрдсэн ажлын хэсгийн дүгнэлт хэзээ гарахаас шалтгаалан Тавантолгойн гэрээг УИХ-ын чуулганаар хэлэлцэх хугацаа тодорхой болно. Тэгвэл ирэх долоо хоногийн мягмар гаригт ажлын хэсэг хэвлэл мэдээллийнхэнд нээлттэй хуралдах тов гаргасан байна.

Өөрөөр хэлбэл Тавантолгойн хөрөнгө оруулалтын гэрээний англи хэл дээрх эх хувилбар ирсэн тохиолдолд ажлын хэсгийн дүгнэлт бэлэн болж, ирэх долоо хоногийн пүрэв гаригт УИХ-ын нэгдсэн чуулганаар хэлэлцүүлэхээр төлөвлөөд байгаа аж.

Өнөөдөр ажлын хэсэгт тулгараад байгаа нэг асуудал нь Тавантолгойн хөрөнгө оруулалтын гэрээний англи хэл дээрх эх хувилбарыг Засгийн газраас өгөхгүй байгаа юм. Ажлын хэсэг заавал англи хувилбарыг шаардаж байгаа нь хөрөнгө оруулагч талтай ямар нэг маргаан үүсгэсэн тохиолдолд Олон Улсын арбитрын шүүх англи хувилбарыг гол бичиг баримтаа болгон маргааныг шийдвэрлэдэгтэй холбоотой юм.

Сүүлийн жилүүдэд Монгол улс арбитрын шүүхэд өөр бусад асуудлаар ялагдах болсон нь англи хэл дээрх гэрээ, монгол хэл дээрх гэрээний зүйл заалтууд зөрүүтэй байдагтай холбоотой гэж холбогдох албаныхан үзэх болсон билээ.

Н.МЯГМАР