Итгэл хүлээж, нийгэмшсэн тэнэмэл иргэдэд гэр өгчээ
“Нарантуул” захын ойролцоо байнга байдаг 70 гаруй, ирж очин орогнодог 200 орчим тэнэмэл, архины хамааралтай иргэн байдаг аж. Иймээс тус дүүргийн Засаг дарга Д.Пүрэвдаваа санаачилж, дүүрэг байгуулагдсаны 50 жилийн ойг угтаж, ЗДТГ, Цагдаагийн нэгдүгээр хэлтэстэй хамтран архины хамааралтай, орон гэргүй, тэнэмэл иргэдийг нийгэмшүүлэх нэг сарын аян зохион байгуулжээ. Аянд архины хамааралтай тэнэмэл 70-аад, “Эгэл амьдралын мөр” ТББ-д бүртгэлтэй 18 иргэнийг хамруулсан байна. Эдгээрээс 22 иргэнийг ажилтай болгон, нийгэмшүүлэх ажлыг төрийн болон төрийн бус 13 байгууллага хийжээ. Мөн сарын хугацаанд тогтмол ажиллаж, нийгэмшин, байгууллага хамт олны итгэлийг хүлээсэн иргэн Г.Буяндэлгэр болон С.Гомбо түүний гэргий Б.Гүнжинлхам нарт “Шижирт гүн” компаниас таван ханатай гэр өгснийг дүүргийн Засаг дарга хүлээлгэн өгсөн байна.
Б.ЦЭЛМЭГ
Сэтгэгдэл