Өнгөрсөн бямба гаригт Баян-Өлгий, Говь-Алтай, Ховд, Увс аймгийн нутагт болсон цаг агаарын гамшигт үзэгдлийн улмаас Увс аймгийн Түргэн сумын цахилгаан дамжуулах агаарын шугамын 220 кВ-ын 4, Өмнөговь суманд 110 кВ-ын 9 нийт 13 төмөр тулгуур багана унасан байна.

Цахилгаан дамжуулах агаарын шугамын төмөр тулгуур багана унасны улмаас Баян-Өлгий аймгийн 12, Говь-Алтай аймгийн 5, Ховд аймгийн 15, Увс аймгийн 18, нийт 4 аймгийн 50 суманд цахилгаан тасарчээ.

Үүссэн нөхцөл байдлыг арилгахаар “Баруун бүсийн эрчим хүчний систем” ХХК, “Цахилгаан дамжуулах үндэсний сүлжээ” ХХК-ийн ажлын хэсэг ажиллаж байгаа аж. Мөн “Цахилгаан дамжуулах үндэсний сүлжээ” ХХК-аас 20 хүний бүрэлдэхүүнтэй ажлын хэсэг Улаанбаатараас хөдөлжээ.

Увс аймгийн Дулааны 1, 2-р станцууд бага температураар дулаан түгээж эхэлсэн бөгөөд хэрэглээний ус өгсөн, унасан шугамын сэргээн засварлалтын ажил үргэлжилж байгаа аж. Тус аймгийн Онцгой комиссын төв штаб 24 цагаар жижүүр гарган ажиллажээ.

Д.ТУЯА