-АЛГА БОЛСОН НОХОЙГ МААНЬ ЧОНО ГЭЭД ФЭЙСБҮҮКТ ЗУРГИЙГ НЬ ТАВЬЧИХСАН БАЙСАН-

Энэ сарын 8-ны өдөр буюу шинийн гурванд “Хан-Уул дүүргийн 15-р хороонд чоно байна” гэсэн дуудлага 16:30 минутын орчимд цагдаагийн байгууллагад нэгэн иргэнээс ирсэн байдаг. Төд удалгүй илүү тэнгэртэйдээ харагддаг гэх чонын хошууг цагдаа нар гутлынхаа үдээсээр боож буй зураг олон нийтийн сүлжээнд цацагдсан. Хотын төвд урилгагүй гэнэт орж ирсэн саарал боохойг шаардлагатай үзлэг, шинжилгээнд оруулсныхаа дараагаар байгальд нь эргүүлэн тавина гэх мэдээлэл хэвлэл мэдээллийн хэрэгслүүдээр гарсан билээ.

Гэвч тухайн амьтан чоно биш нохой байсан гэдгийг Нийслэлийн байгаль орчны газар МУИС-ийн Биологийн тэнхмээр тодорхойлуулж энэ сарын 12-ны өдөр эзэнд нь хүлээлгэн өгсөн юм. Өнгө зүсээрээ чонотой төстэй ч хамар, толгой, хоншоор нүдний өнгө, савруугаараа зэрлэг чоноос эрс ялгарах ХАСКИ нохойны эзэнтэй утсаар холбогдож зарим зүйлсийг тодрууллаа. Уг үйл явдалтай холбогдуулан цахим орчинд хүмүүс хөгжилтэй пост оруулсаар, чонотой андуурагдсан хаски нохой “Од” болж байна.

-Чоно гэж андуурагдсан Хаски нохой ямар нэртэй вэ. Та хэзээ нохойгоо алдсан бэ?

-Манай нохойг Roxsi гэдэг. Бид нохойгоо таван сарын өмнө есдүгээр сарын дунд үед алдаад өнөөдрийг хүртэл олоогүй хайж байсан. Байранд тэжээдэг учраас зун халууцаад байхаар нь зусланд ахындаа аваачиж тавьсан юм. Тэд маань хашааныхаа нохойтой хамт уячихаад түр гараад ирэх хооронд гинжтэй нь хамт хулгайлаад аваад явчихсан байсан. Нохойгоо алдснаасаа хойш манай гэр бүлийнхэн олон нийтийн сүлжээнд зар тавьж гадуур хайсан ч олоогүй л дээ. “Хөөрхий маань хаана явдаг бол, сайн эзэнтэй учирсан бол яахав дээ” гэж боддог хэдий ч харуулдаад л суудаг байлаа.

-Хамгийн анх олон нийтийн сүлжээнд таны нохойг чоно гээд тавьчихсан байхыг хараад гайхсан уу. Эсвэл нохойгоо таниагүй юу?

-Шинийн гуравны өдөр фэйсбүүк үзээд сууж байтал манай нохойны зургийг чоно гээд тавьчихсан байдаг юм. Би нохойгоо хараад шууд таньсан ч турж эцээд өнгө царай зүс алдчихсан болохоор нь жаахан эргэлзсэн л дээ. Тэгээд гэрийнхэндээ үзүүлтэл бүгд л “Мөн байна, мөн байна ш дээ” гэцгээсэн. Бид чинь бүгдээрээ сандралдаад мэдээ бичсэн сайт руу холбогдож Хан-Уул дүүргийн цагдаа нар бариад Нийслэлийн байгаль орчны газарт хүлээлгэж өгсөн гэдгийг мэдсэн. Хоёрдугаар сарын 8-ны өдрөөс хойш баахан шинжилгээ хийгээд дөнгөж өчигдөр л нохойгоо хүлээж авлаа. Өчнөөн сар гадуур хэссэн юм чинь гээд нохойгоо “Жонон” мал эмнэлэгт аваачиж үзлэгт оруулж, угаалгалаа. Roxsi маань гэр бүлээсээ удаан хугацаанд хол байсан ч гэсэн эрүүл байна лээ. Хөөрхий минь тэжээвэр юм болохоороо биднийг хараад баярлаад сүйд болсон. Манай Roxsi эзнээсээ зугтаасан байх. Ийм хөөрхөн амьтаныг хаяагүй байхаа.

-Удааны хугацааны туршид гэр бүлээсээ хол байсан Roxsi гэртээ ирээд тааваараа байна уу?

-Манай гэр бүлийнхэн удаан хугацаанд хайсан нохойгоо чонотой андуурагдаж олдсонд маш их баярлаж байгаа. /инээв. сурв/ “Одоо гэрээсээ гарахгүй шүү” гэсэн янзтай хаширчихсан амьтан гэртээ хэвтэж л байна. Чонотой андуурсан болохоор одоо болтол хүмүүсийн анхаарлыг татаад л байна. Манай охин нохойгоо гэртээ ирэнгүүт нь хүмүүсийн санааг амараая гээд олон нийтийн сүлжээнд зургийг тавьсан ч хүмүүсийн шуугиан намжихгүй л байна. Чоно юу гэж тийм амархан хүнд баригдах вий дээ. Roxsi маань жаахан турсан байна лээ. Гэртээ ирчихсэн юм чинь хэдхэн хоногийн дотор тэнхрээд урьдын хэвэндээ орчихоно. Нохой маань одоо дажгүй ээ.

-Та нохойгоо хэдэн жил тэжээж байгаа вэ?

-Манай охиныг нохойнд дуртай болохоор найз нь 2015 онд Roxsi-г 14 хоногтой жижигхэн гөлөг байхад нь авчирч өгч байсан. Тухайн үед ээжтэй нь хамт 10 хоног байлгаж жаахан том болохоор нь эргүүлээд гэртээ авчирч байлаа. Нялхаараа манайд ирсэн учраас гэр бүлийн маань гишүүн шүү дээ. Одоо нохойгоо ийшээ тийшээ аваачихгүй ээ байрандаа л байлгаж байя.