2018 оны жилийн эцсийн санхүүгийн болон татварын тайлан хүлээж авах хуулийн хугацаа маргааш дуусна. Гэвч аж ахуй нэгж, албан байгууллагуудын нягтлангууд www.e-тах.mn сайт руу татварын тайлангаа илгээж чадахгүй нэг сарын нүүрийг үзэх гэж байна. Цахим тайлангийн систем нь ажлын цагаар ачааллаад ажиллахгүй эсвэл албан газруудын эцсийн үлдэгдэл нь харагдахгүй, үнийн дүн нь зөрүүтэй харагддаг байна. Тиймээс нягтлан бодогчид шөнө 02:00 цагаас үүрийн 06:00 цагийн хооронд татварын тайлангаа илгээж буй талаараа фэйсбүүкийн “Монголын нягтлан бодогчдын нэгдсэн групптээ” бичжээ. Мөн “Илгээх” товчийг байнгын бэлэн байдалд байж ойр ойрхон дарахгүй бол www.e-тах.mn нь хүлээж авдаггүй байна. Нэг ёсондоо албан газруудын нягтлан бодогч нар шөнийн цагаар ажиллаж эрүүл мэнд, цаг хугацаагаар хохирч байна гэсэн үг юм.

Энэ асуудлыг Татварын ерөнхий газраас тайлбарлахдаа “Системийн шинэчлэл хийгдэж илүү боловсронгуй болж буй учраас тун удахгүй www.e-тах.mn сайтын үйл ажиллагаа хэвийн болно. Нягтлангуудын тайланг огт хүлээж авахгүй байгаа юм биш. Зарим үед гацах тохиолдол гарч байгаа” гэж байгаа.

Аж ахуй нэгжүүд маргаашийн дотор 2018 оны жилийн эцсийн санхүүгийн болон татварын тайлангаа www.e-тах.mn сайт руу илгээгүй тохиолдолд Зөрчлийн хуулиар дөрвөн мянган нэгжтэй тэнцэх хэмжээний төгрөгөөр торгуулах юм.