ОХУ-ын Санкт-Петербург хотын Мэдээллийн технологи, механик, оптикийн үндэсний судалгааны их сургуулийн нэгэн байрны дээвэр нурсны улмаас тавдугаар давхарт Вьетнам, Монгол, Хятадын оюутнууд гарах гарцгүй болсон байсныг аварчээ. Энэ талаар Санкт-Петербургийн Онцгой байдлын газрын дарга шуурхай хуралдаан дээр мэдэгдсэн гэж 78.ru цахим хуудас мэдээлсэн байна.

Эх сурвалжийн мэдээлснээр нуранги үүссний улмаас гарах гарцгүй болсон танхимд 26 хүн тэр дундаа Вьетнамын 14, Монголын 4, Хятадын 2 оюутан байсан гэнэ. Аврагчид тэднийг сунадаг шат ашиглан нүүлгэн шилжүүлжээ.

“Тавдугаар давхрын шал нурсны улмаас хүмүүс унаж гэмтэх аюултай байсан. Орос хэл сайн мэдэхгүй гадаадын иргэд байсан тул тэд ихээхэн цочирдсон байлаа. Гал сөнөөгчид тавдугаар давхар руу шатаар автомат шат ашиглан гарсан. Мэдээж оюутнууд тийм өндрөөс шатаар буухаас айж байсан ч тэднийг хоёр аврагч дагалдан буулгасан. Шуурхай ажилласны дүнд олон оюутны амийг аварлаа” гэж Петербургийн онцгой байдлынхан мэдэгджээ.

Энд дуулгахад, хоёрдугаар сарын 16-ны бямба гаригт орон нутгийн цагаар 17 цаг орчимд \Улаанбаатарын цагаар 16-ны 22 цаг\ Мэдээллийн технологи, механик, оптикийн үндэсний судалгааны их сургуулийн дээвэр, таваас нэгдүгээр давхар хүртэлх модон хучлага нурсан байна. Дээвэр нурах үеэр дотор хичээл орж байсан бөгөөд сургуулийн байрнаас 86 хүнийг нүүлгэн шилжүүлжээ. Нурангийн улмаас бэртэж гэмтсэн хүн гараагүй гэж эх сурвалжууд дамжуулсан байна.

Их сургуулийн барилга XIX зуунд баригдсан бөгөөд барилгад засвар хийх үеэр технологийн горим алдагдсны улмаас дээвэр нурсан гэсэн урьдчилсан дүгнэлт гаргажээ.

Б.АНАНД