-СҮҮЛИЙН ГУРВАН ЖИЛД АЖИЛГҮЙДЛИЙН ТҮВШИН БУУРСААР 6.6 ХУВЬД ХҮРСЭН-

“Тинк банк 2019 мөнгө, санхүүгийн орчин" хэлэлцүүлэг Төрийн ордонд болж байна. Хэлэлцүүлгийн үеэр УИХ-ын дарга Г.Занданшатар үг хэлэхдээ, “Сүүлийн хоёр жил гаруй хугацаанд эдийн засаг тогтворжиж, өсөлт 6.2 хувьд хүрлээ. Монгол Улс нийтдээ 6.5 их наядын Засгийн газрын өрийг төлж, дарамт буурлаа. Инфляци 7.3 хувьтай байна. Улсын төсөв сүүлийн найман жилд анх удаа ашигтай гарлаа. Монголбанк 22 тонн алт худалдаж авсан нь сүүлийн жилд байгаагүй өндөр амжилт. Иргэдийн хадгаламж тогтвортой өсч байна. Сүүлийн гурван жилд ажилгүйдлийн түвшин тасралтгүй буурсаар 6.6 хувьд хүрсэн. УИХ-ын намрын чуулганаар 2019 оны улсын төсөв, мөнгөний бодлогыг баримталсан. Энэ онд эдийн засгийн тогтвортой байдлыг хангахад чиглэгдэнэ. Сүүлийн хоёр жилд банкны салбарт эрхзүйн орчны шинэчлэл амжилттай хэрэгжлээ. Энэ онд банкийг бэхжүүлэх, дахин хөрөнгөжүүлэх арга хэмжээг шат дараатай авч хэрэгжүүлнэ” хэмээлээ.

Хэлэлцүүлэгт оролцож буй Монголбанкны ерөнхийлөгч Н.Баяртсайхан хэлэхдээ, "2019 онд Монголбанк үүсэн байгуулагдсаны 95 жилийн ой тохиож байна. Энэ бол Монгол Улсад банк, санхүүгийн байгууллага үүсэн байгуулагдсаны 95 жилийн ой юм. Монголбанк эдийн засгийн сэргэлт, түүний хүртээмжтэй байдлыг бий болгоход бодит хувь нэмэр оруулж байгаа. Банк, санхүүгийн системд хууль, эрх зүйн шинэчлэлийг амжилттай хийлээ. Мөнгөний бодлогыг амжилттай хэрэгжүүлж чадлаа. Мөнгө зээлийн зохистой өсөлтийг хангаж, эдийн засгийн сэргэлт эрчимжиж байна. Зээлийн хүүг бууруулах, хүртээмжийг нэмэгдүүлэхэд чиглэсэн арга хэмжээг авч хэрэгжүүлсэний үр дүнд гарлаа. Зээлжих зэрэглэл нэмэгдсэн нь бусад хувийн секторийн байгууллагуудад ашигтайгаас гадна гадаадын хөрөнгө оруулалт нэмэгдэхэд чухал нөлөө үзүүлнэ. Харин 2019 он бол Монголын банкны салбарыг хүчирхэг болгох жил байх болно" гэлээ.

Хэлэлцүүлэгт:

-Монголбанкны Мөнгөний бодлогын газрын захирал Б.Баярдаваа “Эдийн засгийн төлөв, мөнгөний бодлого” сэдвээр,

-Монголбанкны Нөөцийн удирдлага, санхүүгийн зах зээлийн газрын захирал А.Энхжин “Валютын захын нөхцөл байдал, Төв банкны оролцоо” сэдвээр,

-Глобал эдийн засгийн хүрээлэнгийн захирал Р.Амаржаргал “Гадаадын банкны санхүүгийн зах зээлд үзүүлэх нөлөө, нэвтрүүлэхэд тохиолдох эрсдлийг бууруулах арга зам” сэдвээр,

-Монголбанкны Эдийн засгийн судалгаа, сургалтын хүрээлэнгийн захирал С.Дэмбэрэл “Эдийн засгийн төлөв, инфляцийн дүн шинжилгээ” сэдвээр тус тус илтгэл тавьж байна.