МҮХАҮТ-ын ХХ их хурал энэ сарын 28-ны өдөр буюу маргааш зохион байгуулагдана. Тус хурлаар өнгөрсөн дөрвөн жилийн хугацаанд хийсэн ажлын тайлан, хяналтын зөвлөлийн тайлан, МҮХАҮТ-ын дүрэмд нэмэлт өөрчлөлт оруулах, дээд байгууллагын сонгууль явагдах юм.

Дээд байгууллагын сонгууль буюу байгууллагын ерөнхийлөгчид дөрвөн хүн нэр дэвшиж байгаа. Тодруулбал, одоогийн ерөнхийлөгч Б.Лхагважав, Бүгд найрамдах намын дарга Б.Жаргалсайхан, Ард санхүүгийн нэгдлийн гүйцэтгэх захирал Ч.Ганхуяг, UFC группын ТУЗ-ын дарга О.Амартүвшин нар нэр дэвшихээр хүсэлтээ гаргаад байна.

Нэр дэвшигч “Ард” санхүүгийн нэгдлийн гүйцэтгэх захирал Ч.Ганхуягийн хувьд одоогийн МҮХАҮТ-ын бүтэц 3500 гаруй бизнес эрхлэгчдийг эгнээндээ нэгтгэсэн ч нийтэд ил тод бус, санхүүгийн мэдээлэл нь нууцлагдмал байгааг шүүмжилсэн. Мөн тэрээр ерөнхийлөгчөөр сонгогдсон тохиолдолд намын гишүүнчлэлээс татгалзаж, цалин авахгүй ажиллана гэдгээ мэдэгдээд буй.

Нэр дэвшигч Бүгд найрамдах намын дарга Б.Жаргалсайханы хувьд “МҮХАҮТ бол бизнесийнхэнд үйлчилдэг, алдаа оноог нь хэлж өгдөг, сургадаг, эрхийг нь хамгаалдаг байгууллага. Мөн төртэйгээ ажиллах тогтолцоог нь илүү явуулах шаардлагатай байна” гэжээ.

Нэр дэвшигчдийг 800 гаруй төлөөлөгч нээлттэй саналаар сонгох юм. Дөрвөн жилийн өмнөх их хуралд Б.Лхагважав, "UFC групп"-ийн Ерөнхийлөгч О.Амартүвшин нар өрсөлдөж байсан билээ. “Ард” санхүүгийн нэгдлийн гүйцэтгэх захирал Ч.Ганхуяг, МҮХАҮТ-ын Ерөнхийлөгч Б.Лхагважав нарын хувьд МАН-ын бага хурлын гишүүд юм.