-ТАЛУУД БҮГД ӨӨРСДИЙГӨӨ ӨМӨӨРСӨН МЭДЭЭЛЭЛ ХИЙСЭН-

Өнгөрөгч долоо хоногт хөрсний нурангийн улмаас том оврын машинууд осолдож хүний амь нас эрсэдсэн, улсын онц обьектод хүн нас барсан гэх зэрэг хүний санаанд үл багтам хэргүүд ар араасаа гарав.

Хууль хүчний байгууллагынхан нэг өдөр хоёр талд хэвлэлийн хурал зарласан ч хэрэг явдлын учрыг тайлж, иргэдийн мэдэх эрхийг хангасан мэдээлэл хийгээгүйд нийгэм бухимдалтай хандсан юм. Яг ямар учир шалтгаанаас үүдэлтэй хэргүүд байсанд бүрэн хариулт мэдээлэл өгсөнгүй, нэгэнт нийгэмд аль хэдийн тарсан мэдээллийг багцлан хүргэв. Энэ өдрүүдэд хэрэгт хамаарал бүхий талууд өөр өөрсдийгөө өмөөрсөн мэдээлэл хийсэн билээ.

Долоо хоногийн эхний өдрүүдээс эхлэн Баянгол дүүргийн 20 дугаар хорооны нутаг дэвсгэрт байрлах урьдчилан хорих 461-р ангид камерын өрөөнд шүүгч амиа алдсан хэргийн талаар шуугиж эхэлсэн. Талийгаач Л.Бямбааг “Салхитын мөнгөний орд”-ын авлигын хэргээр түр буюу 48 цаг саатуулагдаж байсан гэх. Холбоглох хууль хүчний байгууллагынхан талийгаач өөрийн өмсөж байсан хөхний даруулгаар өөрийгөө боомилсон байдалтай нас барсан гэсэн мэдээллийг өгсөн юм. Харин дээрх мэдээллийг ар гэрийнхэн нь эрс эсэргүүцсэн мэдээлэл хийж, хэвлэлд байр сууриа илэрхийлсэн. Талийгаач Л.Бямбаагийн хүү Нийслэлийн Захиргааны хэргийн анхан шатны шүүхийн шүүгч С.Төмөрбат: Миний ээжийг хээл хахуулийн хэрэгт шалгагдаж байсан хэмээн гүтгэж байна. Мөн өөрөө амиа хорлоогүй гэсэн юм.

-ТАЛИЙГААЧ ГЭРЭЭСЛЭЛДЭЭ ШҮҮГЧ НАРЫН НЭРИЙГ ТОДОРХОЙ ДУРЬДСАН-

Албанаас өгч буй мэдээллээр Талийгаач Л.Бямбааг хорихоос өмнө нь АТГ-ын мөрдөгчид ажлын өрөөнд нь нэгжлэг хийх үеэр авлигал өгсөн гэх ноцтой баримт илэрсэн учраас цагдан хорьсон. Амь насаа алдахаас өмнө гурван ширхэг гэрээслэл бичиж үлдээсэн. Түүндээ “Миний хүү энэ хэрэгт хамаагүй. Би шүүгчид рүү мөнгө шилжүүлсэн” хэмээн шүүгчдийн нэрийг тодорхой дурьдсан байсан гэсэн юм.

Талийгаач Л.Бямбааг амиа алдсан хэрэгт АТГ-ын мөрдөгчид буюу коммисарууд, ШШГЕГ-ын алба хаагчид буруутай хэмээн өмгөөлөгч мэдээлэл хийсэн.

Албан бус мэдээллээр, нас барахаас нэг цагийн өмнө талийгаачийг гадуур байцаасан гэх мэдээлэл байгаа юм. Гадуур байцаахдаа нийт гурван цаг байцаасан аж. Түүнийг АТГ-аас 48 цагийн хугацаагаар хорихоор авч ирсэн учраас зөвхөн АТГ-ын Мөрдөгч нар онцгой тохиолдолд гадуур байцаах эрхтэй байдаг. Талийгаачийг хэн авч гарч, ямар байдлаар байцаасан талаар мэдээлэл авах гэсэн боловч холбогдох байгууллагынхан нууцалж байна гэсэн юм.

Хэргийн учир зангилаа өнөөдрийг хүртэл тодорхойгүй байна.

-НУРАНГИНД ДАРАГДСАН ДӨРВӨН ИРГЭНИЙГ АВРАХ НАЙДВАР ХОМС ГЭВ-

Хоёрдугаар сарын 28-ны өдрийн 16:00 цагт Төв аймгийн Заамар сумын Хайлааст багийн Баянголын-Амны “Ууцар” гэдэг газар “Эко-Алтан Заамар” ХХК-ийн ашигт малтмал олборлолтын 100 метр өргөн, 80 метр гүнтэй ил уурхайд нуралт болж зургаан хүн, хоёр трактор шороонд дарагдсан.

Уурхайн ажилчид Улаанбаатар хотын Налайх дүүргийн харьяат иргэн Б /34 настай, эрэгтэй/, Баянхонгор аймгийн Баянхонгор сумын харьяат иргэн Н /28 настай, эрэгтэй/ нарыг эсэн мэнд 16:05 цагт гаргасан байна.

Нурангинд дарагдсан гэх дөрвөн иргэн нь Улаанбаатар хотын Баянзүрх дүүргийн харьяат иргэн 53 настай эрэгтэй Г, Баянхонгор аймгийн Баянхонгор сумын харьяат эрэгтэй, 38 настай П, Булган аймгийн Хангал сумын харьяат эрэгтэй, 31 настай О, Улаанбаатар хотын Сонгинохайрхан дүүргийн харьяат эрэгтэй, 31 настай Б нь нэг бульдозер, нэг экскаватор машин нурангинд дарагдсан байдалтай байна.

Тэднийг нийт 30 алба хаагч эрэн хайх аврах ажиллагааг үргэлжлүүлж байгаа бөгөөд уурхайн нуранги доороос усны ундарга илэрсэн, ус урсаж гарч ирж байгаа учраас аврах ажиллагаа хүнд нөхцөлд явагдаж байгаа, аврах боломж тун хомс гэдгийг газар дээр нь ажиллаж байгаа аврагчид хэлж буй аж.

Уг ноцтой осол болсон уул уурхайн компани нь “Эко Алтан заамар” ХХК-ийн эзэмшлийн А зэрэглэлийн зөвшөөрөлтэй үйл ажиллагаа явуулдаг аж.

Төв аймгийн Заамар сумын Хайлааст багын нутагт орших Их тохойрол нэртэй MV-007712 болон Баянголын эх MV-018995, Бор толгой MV-021015 тоот ашиглалтын тусгай зөвшөөрлүүдийг эзэмшдэг байна. Тус компани нь “Алтайн хүдэр” компанийн эзэн Ч.Базар нэгэн юм байна.

Байгаль орчныг хамгаалах тухай хуулиудыг зөрчсөн үйл ажиллагаа олон жил явуулсан, нөхөн сэргээлт хийдэггүй, ухаж ашигласан газраа журмын дагуу аюулгүй болгоогүйн улмаас ийм ноцтой осол гарсан хэмээн нутгийн иргэд хэлж байна. Одоогоор ослын шалтгаан нөхцлийг тогтоохоор онцгой байдлынхан ажиллаж байна.