ОХУ-ын Эрхүү хотын Кировын дүүргийн шүүх Байгал нуурын эрэг дээр Култук сууринд ундны ус савлах үйлдвэр барихыг хориглосон шийдвэр гуравдугаар сарын 27-ны өдөр гаргажээ. Ийнхүү Байгал нуурын эрэг дээр үйлдвэр барихыг хориглох шаардлагыг Баруун Байгалын байгаль хамгаалах прокурорын газар шүүхэд хандан гаргасан байна.

Үйлдвэрийг байгуулах асуудлаар олон нийтийн сонсгол зохион байгуулах, экологийн дүн шинжилгээ хийхдээ Хятадын компани зөрчил гаргасан гэдгийг прокурорын ажилтнууд олж тогтоожээ. Шалгалтын явцад үйлдвэр баригдахаар төлөвлөж байсан газарт улаан номонд багтсан шувууд нутагладаг болох нь тогтоогдсон байна. Түүнчлэн барилгын талбай дээр их хэмжээний үйлдвэрийн хог, газрын тосны бүтээгдэхүүн асгарсны ул мөр олджээ.

Энд дуулгахад, Байгал нуурын уснаас жилд 190 сая литр ус авч савлан худалдаалахаар төлөвлөж байсан газар нь Хятадын компани юм байна. Энэ компани үйлдвэрийнхээ бүтээгдэхүүний 80 хувийг Хятад болон бусад орнууд руу нийлүүлэхээр төлөвлөж байжээ.

Сүүлийн үед Орост ихээхэн анхаарал татаж буй энэ хэрэгтэй холбоотойгоор экологчид болон олны танил хүмүүс эсэргүүцлээ илэрхийлэх нь улам идэвхижсэн юм. Тухайлбал Оросын алдарт уран бүтээлч Сергей Зверев гуравдугаар сарын 4-ний өдөр Москва хотын Улаан талбай дээр ганцаарчилсан эсэргүүцэл зарласан. Харин гуравдугаар сарын 12-ны өдөр Красноярскын Универсиад-2019 наадмын үеэр Оросын Засгийн газрын тэргүүн Дмитрий Медведев улсынхаа шигшээ багтай уулзах үеэрээ Байгал нуурын экологид заналхийлж буй энэ асуудлыг нарийвчлан судлах үүрэг өгөхөө амласан юм. Улмаар гуравдугаар сарын 15-ны өдөр Хятадын компанийн барилгын ажлыг зогсоож байв.

Б.АНАНД