Монголын Үндэсний Бөхийн Холбооноос дөрөв, тавдугаар сард зохион байгуулах барилдаануудад “хаялцах барьц” сонгохгүй байх шийдвэр гаргажээ. Сүүлийн жилүүдэд удааширсан барилдааныг шийддэг гол хэрэгсэл болсон “хаялцах барьц”-ыг зарим бөхчүүд, бөхийн хорхойтнууд, мөн зарим бөхийн дасгалжуулагч нар эсэргүүцэж, барилдаан удааширдаг гол шалтгаан хэмээн үзэх болсон. Үүнтэй холбоотойгоор МҮБХ-ноос уг барьцыг бариулахгүй, удааширсан барилдааныг давхар шуудагдсан барьцнаас барилдуулахаар шийдвэр гаргасан байна.

Хоёр бөхийн барилдаан удааширсан тохиолдолд барих талаа шодож, дийлсэн бөх өөрийн давуутай талаар давхар шуудагны барьц авах бөгөөд учраа бөх ямар нэг барьц авахгүйгээр барилдаан үргэлжлэх юм. Уг барьцнаас хаялцаагүй тохиолдолд нөгөө бөх барьцыг барина. Энэ барьцыг дөрөв, тавдугаар сард болох барилдаануудад турших бөгөөд үр дүнтэй байвал “хаялцах барьц”-ыг ахин хэрэглэхгүй юм байна.