-ХЭЗЭЭ ЦАХИЛГААНТАЙ БОЛОХ НЬ ТОДОРХОЙГҮЙ СӨХ-ААС ЯМАР НЭГЭН МЭДЭЭЛЭЛ ӨГӨӨГҮЙ БАЙНА-

Дөрөвдүгээр сарын 3-4-нд шилжих шөнө Хан-Уул дүүрэгт байрлах “Ивээл” хотхоны 41Б байрны найман давхрын орцны цахилгааны шийднээс гал гарч улмаар кабелийн сувгаар дээш өгсөж 12 давхарт хүртэл шатжээ. Ийнхүү 8-12 нийтдээ таван давхарын орцны бүх цахилгааны шийд шатсан аж.

Гал гарсан шалтгааныг мэргэжлийн байгууллагууд эцэслэн тогтоох бөгөөд одоогоор тус хотхоны 41Б байрны бүх айл өрхүүд цахилгаангүй хэвээр байна. гал гарч буй дуудлагын дагуу Нийслэлийн онцгой байдлын Гал унтраах 14-р ангийн нийт найман бүрэлдэхүүнтэй алба хаагчид хоёр минутад очиж, галыг түргэн шуурхай унтраасан аж.

Оршин суугчдын хэлж буйгаар, Гал гарч эхэлмэгч орц бүхэлдээ утаагаар дүүрсэн байсан. Гал гарсныг түрүүлж мэдсэн иргэд бусад айлынхаа хаалгыг тогшин гадагш гарахыг сануулж байсан юм. Бүх айлын хүмүүс гадаа гарч утаа гарахыг хүлээж зогссон. Мөн Гал унтраах 14-р анги яг хажууханд байдаг учраас дуудлага өгөөд тун удалгүй ирж шуурхай унтраасан. Хэрэв шуурхай ирж унтраагаагүй бол олон хүн угаартаж, олон айл шатах байлаа. Одоогоор оршин суугчдын ихэнх нь галд угаартсан төдийгүй толгой эргэж, нүд харанхуйлж, бөөлжих зэргээр угаартсан шинж тэмдэг илэрч байгаа. Төрөөд аравхан хонож байсан нярай хүүхэд гал гарснаас угаартаж эмнэлэгт хэвтсэн. Нийт оршин суугчид нэгдэж хандах газарт нь хандана. Учир нь аюултай нөхцөлд олон иргэнийг амьдруулж байна. Одоогоор хэзээ цахилгаантай болох нь тодорхойгүй. СӨХ-ны зүгээс ямар нэгэн мэдээлэл өгөөгүй байна гэв.

Байрны дээд давхруудад гал гарсан учраас дээд давхрын айлууд гэртээ орох боломжгүй, учир нь бүх тавилга, эд зүйл нь утаа болж ашиглахын аргагүй болсон. Харин доод давхрын оршин суугчид гэртээ цахилгаангүй байгаа талаар бидэнд мэдээллээ.

-ДӨНГӨЖ ТӨРСӨН ХҮҮХЭД МААНЬ УГААРТААД ОДОО ЭМНЭЛЭГТ ХЭВТЭЖ БАЙНА-

Оршин суугч А:

-Сайн байна уу. Танай байранд гал гарсан талаар мэдээлэл авах гэсэн юм. Юу болсон юм бэ?

-Сайн байна уу. Энэ сарын 3-4-нд шилжих шөнө орой хүүхдээ унтуулчихаад хэвтэж байсан. Гэтэл нөхөр маань гал гараад байна гээд сэрээсэн. Эхлээд нөхөр маань олон хүн шуугилдаад байхаар нь согтуу хүмүүс муудалцаад байна гэж бодсон гэсэн. Гэтэл удалгүй хаалгаар утаа орж ирээд байхаар нь хаалгаа онгойлгоод харсан чинь үүдээр хар утаа бүрхээд ороод ирсэн. Манайх 12 давхарт байдаг юм. Гал найман давхарт гарсан учраас дээд айлууд их утаанд өртсөн. Тэгээд дөнгөж төрөөд удаагүй аравхан хонож байсан хүүхдээ өлгийдөөд гүйгээд гартал орцонд юу ч харагдахгүй утаа болсон байсан. Шат харагдахгүй арай гэж алхаж байсан. Манай нөхөр том охиноо тэврээд буухдаа “Энд хүмүүс байна шүү” гээд орилоод буусан. Тэгээд шат доошлох тусам утаа арай багасаад хүмүүс харагдаж эхэлсэн. Нэг мэдсэн би унтлагын хувцастайгаа гараад ирсэн байсан болохоор манай нөхөр чи төрөөд удаагүй хувцсаа авах хэрэгтэй гээд буцаагаад дээш гараад миний хувцасыг авчирсан.

Машиндаа суугаад айл руу явж байгаад бага хүүхэддээ хөхөө хөхүүлэх гэтэл хөхөхгүй байсан.

-ГАЛ ГАРСАН ӨДӨР БАЙРНЫ ДОХИОЛОЛ АЖИЛЛААГҮЙ-

-Танай бага хүү тань одоо эмнэлэгт байгаа гэсэн. Их угаартсан байсан уу?

-Тэгсэн. Айлд очоод түргэн дуудах хооронд гурван удаа бөөлжөөд огт хөхөө идэхгүй байсан. Түргэний эмч их хурдан ирсэн. Ирээд үзэж байхад нь уруул нүдний доод хэсэг нь хөхрөөд ирсэн. Тэгээд шууд Эх хүүхдийн эрүүл мэндийн үндэсний төв рүү явсан. Миний хүүхэд дөнгөж төрөөд удаагүй байсан болохоор их угаартсан. Тэр үед манай нөхөр унтаж байсан бол юу болох байсныг хэлж мэдэхгүй байна. Одоо би бага хүүхдээ аваад эмчилгээ хийлгэж байна. Маш их гомдолтой байна. Тэр байрыг авахад тамхины утаанд хүртэл утаа сорогч, гал унтраагч ажиллана, галын дохиололтой гэх зэрэг бүх зүйл бүрдсэн байсан. Гэтэл тэр гал гарсан өдөр галын дохиолол, ус цацдаг утаа мэдрэгч нь хүртэл ажиллаагүй. Манайх дээд давхарт байдаг учраас утаанд гэрийн бүх зүйл угаар болж зарим эд зүйл ашиглах аргагүй болсон байна лээ. Очих айлгүй хүмүүс нь гал гарсаны дараа гэртээ буцаж ороод угаартсан гэсэн. Манай яг хажуугийн айлын хэвтэрт байдаг ахын бие нь их тааруу байгаа гэсэн. Надтай манай хороон засаг дарга холбогдоод “Яаж байна” гэж асуусан. Одоогоор хэзээ цахилгаан залгаж, юунаас болж гал гарсныг нь хэлж мэдэх хүн алга байна. Хаана, хэнд хандахаа ч мэдэхгүй байна. Би өөрөө ч гэсэн бие тааруухан байна. Төрөөд удаагүй байсан болохоор гам их алдсан. Одоо хүүхдээ хөхүүлэх гэхээр гар өвдөөд даахгүй байна. Миний хүүхдийг өдөр нь эмч ирж үзээд эрүүл саруул байна гээд гарсан. Гэтэл орой нь гал гараад, одоо ингээд эмнэлэгт хэзээ гарах нь мэдэгдэхгүй байж байна.

ГЭРЭЛ ЗУРГИЙГ: Г.БАЗАРРАГЧАА