Нам нь сонгуульд ялвал Баруун эрэг дахь Израилийн суурингуудын нутаг дэвсгэрийг эзлэнэ хэмээн Израилийн Ерөнхий сайд Биньямин Нетаньяху мэдэгджээ.

Израилийн Парламентын сонгууль мягмар гаригт болох юм. Энэ сонгуулийн гол өрсөлдөгч нь Баруун эргийн суурингуудыг улсдаа нэгтгэхийн төлөө тэмцдэг Нетаньяхугийн Ликуд нам юм.

Баруун эрэг дээр 400 мянга орчим еврей, дахин 200 мянган еврей дорнод Иерусалимд амьдардаг юм. Баруун эрэг дэх Палестины хүн ам 2.5 сая байдаг аж. Олон улсын эрхзүйгээр Баруун эрэг дээр Израилийн суурингууд байршсан нь хууль бус гэж үздэг ч Израиль улс өөрсдийн нутаг хэмээн үздэг.

Эндэхийн суурин хэсэг, тэдгээрийн нутаг дэвсгэр тэлж байгаа болон шинээр суурьшмал бүсүүд үүсч байгаа нь Израиль-Палесины харилцааны хурцадмал асуудлуудын нэг юм.

Палестинчууд Дорнод Иерусалим, Баруун эрэг, Газын зурвасын нутаг дэвсгэр дээр тусгаар улсаа байгуулахыг эрмэлздэг ч Баруун эрэг дахь Израилийн суурингууд ийм боломж олгохгүй байна гэж палестинчууд үздэг.

Энэхүү хоёр орны нутаг дэвсгэрийн маргаантай асуудлын талаар телевизийн ярилцлагын үеэр Ерөнхий сайд Нетаньяхугаас асуухад “Баруун эрэг дээр Израилийн тусгаар тогтнолыг тогтооно” хэмээн мэдэгджээ.

Харин түүний мэдэгдэлд Палестины тал огтхон ч “гайхаагүй” гэдгээ илэрхийлсэн байна. “Израиль улсыг Трампын захиргаа үндэстний эрх болон Палестины ард түмний эрхийг зөрчин дэмжиж байга энэ үед Израиль улс олон улсын эрхзүйн хэм хэмжээг үл тоосон хэвээр байна” хэмээн Палестины тал мэдэгдсэн байна.

Энд дуулгахад, өнгөрсөн гуравдугаар сард АНУ-ын Ерөнхийлөгч Дональд Трамп Сири, Израилийн хооронд маргаантай байдаг Голаны өндөрлөгийг Израилийнх гэж зарласан бол 2017 онд Иерусалимыг Израилийн нийслэл гэж хүлээн зөвшөөрсөн анхны орон болж байв.

Б.АНАНД