Өрхийн цахилгааны тарифыг квт тутамд гурван төгрөгөөр нэмсэн гэдгийг Эрчим хүчний зохицуулах хорооноос мэдээлсэн. Гэвч өрхийн цахилгааны тариф хоёр дахин өслөө гэх мэдээлэл цахим орчинд тархаж олон нийтийг төөрөгдөлд оруулсан билээ.

Тодруулбал, Эрчим хүчний зохицуулах хорооны 92 тоот тогтоолын хавсралтыг хуурамчаар үйлдэн, засвар хийж, айл өрхийн цахилгааны тариф хоёр дахин нэмэгдсэн мэт ташаа мэдээллийг олон нийтэд түгээж байсныг тогтоосон аж. Тус газрын албан ёсны бичиг баримтыг засварлан, хуурамчаар үйлдсэн тухай холбогдох албаныхан залруулан мэдээлсэн юм. Ингэхдээ албан ёсоор төлж буй цахилгааны суурь төлбөрт ямар нэгэн өөрчлөлт ороогүй, зөвхөн сэргээгдэх эрчим хүчний үнэ гурван төгрөгөөр нэмэгдсэн гэсэн тайлбарыг өгсөн байна.

Энэ нь сард 220 квт хүртэлх хэрэглээтэй буюу сард 30 мянган төгрөгний цахилгаан хэрэглэдэг айлд хамгийн ихдээ 700 төгрөгний нэмэгдэл буюу сэргээгдэх эрчим хүчний зардал нэмэгдэж буй ажээ.

Эрчим хүчний сайд Ц.Даваасүрэн “Олон түмэн 64 тэрбум төгрөгний сэргээгдэх эрчим хүчийг нуруундаа үүрч байгаа. Энэ байдлаараа оны төгсгөл гэхэд 100 тэрбумд хүрнэ. Энэ хуулиараа автоматаар ингэж зохицуулагдаж яваад байгаа. Одоо 144-ийг төлж байна. 10 мегаваттын нарны станц ашиглалтад орчихвол түүнийхээ хэмжээгээр 3-5 төгрөгөөр нэмэгддэг” хэмээх тайлбарыг өгсөн билээ.

Эрчим хүчний зохицуулах хорооноос “Эрчим хүчний зохицуулах хорооны 92 тоот тогтоолын хавсралтыг хуурамчаар үйлдэн, засвар хийж, айл өрхийн цахилгааны тариф хоёр дахин нэмэгдсэн мэт ташаа мэдээллийг олон нийтэд түгээж байна. Эрчим хүчний зохицуулах хорооны албан ёсны бичиг баримт засварлан, хуурамчаар үйлдэж, олон нийтийг төөрөгдүүлэх, бухимдал үүсгэх зорилгоор худал ташаа мэдээлэл түгээж байгаа нэр бүхий аккаунт хаяг, фэйсбүүк хуудас болон зарим иргэдийг холбогдох хуулийн дагуу арга хэмжээ авахуулахаар хуулийн байгууллагад хандах болно” хэмээн мэдэгдсэн. Түүнчлэн тус газраас “Эрчим хүчний зохицуулах хороо 2015 оноос хойш хэрэглэгчдийн цахилгааны эрчим хүчний тарифт ямар нэг өөрч­лөлт оруулаагүй байсан. Сэргээгдэх эрчим хүчийг дэмжих тарифыг хэрэг­лэгч­дийн тарифт шин­гээн тооцох ёстой байдаг.

Сүүлийн хоёр жилд гурван нарны цахилгаан станц, нэг салхин станц ашиглалтад орж байна. Үүнтэй холбоотойгоор сэргээгдэх эрчим хүчийг дэмжих тарифыг 1.5 төгрөгөөр нэмэг­дүүлж, хэрэглэгчдэд борлуулах цахилгааны үнийг 1.5 төгрөгөөр индексжүүлэх тоо­цоо­лол хийсэн. Энэ нэмэг­дэл нь хэрэглэгчдэд төдийлөн нөлөөлөхгүй. Индексжүүлэлт нь гадаад хүчин зүйлээс ха­мааралтай. Тухайлбал, нүүрс­ний үнийн өсөлт болон, нүүрсний тээв­рийн зардлын өсөлт, ашиг­лал­тын ус зэрэг эрчим хүч үйлдвэрлэхэд шаардлагатай бараа бүтээг­дэхүүний үнийн өсөл­түүд юм. Мөн валютын ханшийн өөрчлөлтүүд энд хамаа­ралтай. Эдгээр өөрч­лөл­түүд­тэй холбоо­той­гоор 1.5 төгрөгийн өөрч­лөлт хийгдэж, нийтдээ гурван төгрөгөөр нэмэгдсэн” хэмээн тайлбарлаад байна.