АТГ-ын ээлжит хэвлэлийн хурал өнөөдөр боллоо. Хэвлэлийн хурлын үеэр тус газрын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Т.Баярхүү дөрөвдүгээр сард хийж хэрэгжүүлсэн ажлынхаа талаар танилцуулав. Тус газраас ХХААХҮЯ-ны ЖДҮХС-гаас ирүүлсэн “Жижиг, дунд үйлдвэрийг хөгжүүлэх сангаас урт хугацаатай, хөнгөлөлттэй зээл олгох төсөл сонгон шалгаруулах журам”-ын төслийг хянаж, тодорхой санал хүргүүлжээ. Тэдний хэлснээр журмын төсөлтэй танилцах явцад авлига, ашиг сонирхлын зөрчил гарах, хүнд суртал, чирэгдэл учруулсан нөхцөл байдал үүсэж болзошгүй гэж үзсэн байна. Тухайлбал, сонгон шалгаруулах арга зүй, хэрхэн шийдвэр гаргах нь тодорхойгүй, шаардлагагүй бичиг баримтыг заавал бүрдүүлэхээр тусгасан нь хүнд суртал, чирэгдэл үүсгэхээр байгааг журмын төслөөс илрүүлж, эдгээр зохицуулалтуудыг залруулах шаардлагатай гэж үзжээ. Түүнчлэн ЖДҮХС-гийн албан хаагчдын ёс зүйн дүрмийн төслийг судлан үзээд Төрийн албаны тухай хууль, Засгийн газрын 2019 оны 33 дугаар тогтоолоор баталсан “Төрийн захиргааны болон төрийн үйлчилгээний албан хаагчийн ёс зүйн дүрэм”-ийг зөрчсөн зохицуулалт тусгагдсан байх тул хууль тогтоомжид нийцүүлэн дахин боловсруулахаар буцаасан тухайгаа танилцуулав.

Тус газраас хэрэг бүртгэлт, мөрдөн байцаалтын 444 хэрэгт мөрдөн шалгах ажиллагаа явуулснаас 13-ыг нь прокурорт шилжүүлжээ. Эдгээрт "Улаанбаатар дулааны сүлжээ" ТӨХК-ийн захирлаар ажиллаж байсан Б, “Дорнод бүсийн эрчим хүчний систем” ТӨХК-ийн Хангамж, үйлчилгээний хэлтсийн даргаар ажиллаж байсан Г нь албан тушаалын байдлаа урвуулан ашиглан бусдад давуу байдал бий болгон их хэмжээний хээл хахууль авсан хэрэг багтжээ. Мөн Замын-Үүд сумын Засаг даргын тамгын газрын тендер сонгон шалгаруулах үнэлгээний хорооны эрх бүхий албан тушаалтнууд нь албан үүрэг албан тушаалын байдлаа урвуулан ашиглаж техникийн шаардлага, тендерийн тодорхойлолтын шаардлагыг хангаагүй бараа бүтээгдэхүүнийг нийлүүлэх тухай гэрээг байгуулж бусдад давуу байдал бий болгосон хэргүүдийг харьяалах прокурорын байгууллагад шилжүүлжээ.

Мэдээлэл хийснийхээ дараа сэтгүүлчдийн сонирхсон асуултад АТГ-ын ахлах мөрдөн байцаагч, ахлах комиссар Ч.Жаргалбаяр мэдээлэл өглөө.

-Кёкүшюзан Д.Батбаярыг 32 тэрбум төгрөгийн залилангийн хэрэгтэй холбогдуулан танайхаас шалгаж байна гэх мэдээлэл цацагдсан. Мэдээлэл өгөхгүй юу?

-Д.Батбаяр гэх хүнтэй холбоотой гомдол иргэдээс ирсэн. Хэрэг бүртгэл нээж шалгахад залилан мэхлэх гэмт хэргийн шинж тогтоогдсон гэж үзсэн учраас прокурорын байгууллагад харьяалал тогтоолгохоор хандахад харьяаллыг цагдаагийн байгууллагад шилжүүлэх саналаа гаргасан. Хэргийн үйлдэл аргачлал бусад нотлох баримтын талаар мэдээлэл өгөх боломжгүй.

- “Эрдэнэт үйлдвэр”-тэй холбоотой хэрэг ямар шатандаа байна вэ?

-“Эрдэнэт үйлдвэр” ТӨҮГ-тай холбоотой асуудалд мөрдөн шалгах ажиллагаа явж байгаа. Тухайн цаг үед мэдээлнэ. “Жаст”-ын хэрэг бол хянан шалгах шатандаа явж байгаа.

-Тагнуулын ерөнхий газрын дарга асан Б.Хурцыг АТГ-аас шалгаж байгаад цагдаагийн байгууллага руу шилжүүлсэн юм уу?

-Тухайн хэргийг 2018 оны арванхоёрдугаар сард Нийслэлийн прокурорын газраас хэрэг бүртгэлтийн хэрэг нээгээд, тус хэлтэст харьяаллыг нь тогтоогоод ирүүлсэн. АТГ-ын мөрдөн шалгах хэлтсээс тухайн хэргийг шалгаж байх хугацаанд өнгөрсөн баасан гаригт Нийслэлийн прокурорын газраас хэргийг татаж хянаад харьяаллыг цагдаагийн байгууллагад шилжүүлсэн. Үүнд Тагнуулын байгууллагаас мөрдөн шалгах ажиллагаа явуулсан хэрэг биш.

-ЖДҮ-ийг хөгжүүлэх сангаас зээл авсан гэх хэрэгт холбогдсон гурван гишүүнд Эрүүгийн хэрэг үүсгэх талаар яригдаж байсан. Хэргийн явцын талаар мэдээлэл өгөхгүй юу?

-Мөрдөн шалгах ажиллагаа үргэлжилж байна. Таван УИХ-ийг тус хэрэгт Эрүүгийн хэрэг үүсгэн яллагчдаар татаад гурван гишүүнтэй холбоотой асуудал нь Эрүүгийн гэмт хэргийн шинжтэй учраас тэдний хэргийг тусгаарлах саналыг прокурорын байгууллагад гаргаад мөрдөн шалгах ажиллагаа явагдаж байгаа. Түүнээс биш нэмж гурван гишүүнийг хэрэгт татсан зүйл байхгүй.

-Уран зураг хулгайлсан гэх хэрэгт ямар хүмүүсийг шалгаж байгаа вэ?

-Ерөнхийлөгч асан Ц.Элбэгдоржийг уран зураг хулгайлсан гэх асуудал цагдаад шалгагдаж байгаа болохоос манайд шалгагдаагүй.