БНАСАУ-ын удирдагч Ким Жөн Ун ОХУ-д төрийн айлчлал хийлээ. Ким Жөн Ун дөрөвдүгээр сарын 24-нд хувийн галт тэргээрээ Владивостокт хотод зочилсон юм. ОХУ-ын Ерөнхийлөгч Владимир Путин, БНАСАУ-ын удирдагч Ким Жөн Ун нарын хэлэлцээ Владивостокт хотноо болсон. Ганцаарчилсан уулзалтыг 50 минутын хугацаанд явуулахаар төлөвлөсөн байсан ч хоёр улсын удирдагчид цаг гаруй хугацаанд үргэлжилсэн нь олны анхаарлыг ихээхэн татсан.

Удирдагч Ким Жөн Ун энэхүү уулзалт нь олон жилийн түүхтэй, найрамдалт харилцаатай хоёр орны харилцааг хөгжүүлэхэд ихээхэн хувь нэмэр оруулна хэмээн мөн найдаж буйгаа илэрхийлсэн байна. Мөн хоёр улсын удирдагчид хамтын ажиллагааг бүх салбарт өргөжүүлэн, хөгжүүлэх тал дээр ихээхэн ач холбогдол өгч ажиллахаар тохиролцсон байна. Энэ хүрээнд хоёр орны хоорондын худалдаа-эдийн засаг, шинжлэх ухаан-техникийн хамтын ажиллагаа, болон засгийн газар хоорондын комиссын ажилд ихээхэн анхаарч түлхэц өгөхөөр шийдвэрлэсэн ажээ. Мөн засгийн харилцааг илүү өндөр түвшинд гаргах зорилгоор олон салбарт идэвхтэй арга хэмжээнүүд авах шийдвэр гаргажээ.

ОХУ Солонгосын хойгийг цөмийн зэвсгээс ангижруулах, хоёр талын хамтын ажиллагааг хөгжүүлэх болон бүс нутгийн хамтын ажиллагааны талаар ярилцаж, нөхцөл байдлыг сайжруулахын асуудалд санал солилцсон байна. Уулзалтын үеэр цөмийн асуудлыг улс төр-дипломат арга замаар шийдэх асуудалд гол анхаарлаа хандуулах төлөвтэй байгаа юм. Ингэхийн тулд Японы эрх баригчид АНУ, БНСУ, БНХАУ болон ОХУ-тай нягт хамтран ажиллахаар төлөвлөж байгааг мэдэгдсэн.

Түүнчлэн БНАСАУ-ын удирдагч Ким Жөн Ун, ОХУ-ын Ерөнхийлөгч Владимир Путин нар анхны дээд хэмжээний уулзалтынхаа үеэр хоёр талын харилцааг сайжруулах амлалт өгсөн байна.

-БНАСАУ-ын УДИРДАГЧ ОХУ-Д ДАХИН ИРЭХЭЭ АМЛАВ

Уулзалтаас ямар нэг хамтарсан мэдэгдэл гаргаж, гэрээ хэлцэл байгуулсангүй. Гэхдээ уулзалт талуудад чухал ач холбогдолтой болж өнгөрснийг тус тусын албаны эх сурвалжууд мэдээлжээ. ОХУ болон БНАСАУ-ын хооронд дээд хэмжээнд хийж буй уулзалтыг олон улсын түвшинд найрсаг уулзалт боллоо гэж үзэж байгаа юм. Учир нь ОХУ-ын төрийн тэргүүн эх орондоо зочлон ирсэн гадаадын төрийн тэргүүнүүдийг хүлээлгэж байсан нь цөөнгүй. Харин энэ удаад БНАСАУ-ын удирдагч Ким Жөн Уныг уулзах газрын үүдэнд хүлээж зогссон нь ховор үзэгдэл хэмээн олон улсын хэвлэлүүд бичиж байна. Хоёр орны уулзалт уулзалт найрсаг болж байгаагийн илэрхийлэл гэжээ.

Айлчлалын хүрээнд удирдагч Ким Жон Ун сонгодог урлагийн тоглолтыг үзэн сонирхсон байна. Айлчлал энэ хүрээд өндөрлөж нутаг буцахаар зорьсон байна. Түүнчлэн БНАСАУ-ын удирдагч Ким Жөн Ун ОХУ-д дахин ирэхээ амласан байна. Түүнд Владивосток хот таалагдсан хэмээн Приморийн хязгаарын амбан захирагч Олег Кожемяко мэдэгджээ.