Өнгөрөгч дөрөвдүгээр сарын 26-ны өдрийн УИХ-ын чуулганы нэгдсэн хуралдаанаар Монгол Улсын Эрдэнэсийн сангийн 2018 оны төсвийн гүйцэтгэл, Монгол Улсын Эрдэнэсийн сангийн үндсэн сангийн орлого, үндсэн болон гүйлгээ сангийн зарлагын 2019 оны төсвийн тухай Улсын Их Хурлын тогтоолын төслийг хаалттай горимоор хэлэлцсэн.

Энэ үеэр УИХ-ын гишүүн Т.Аюурсайхан нэгэн ноцтой зүйл ярьсан нь олон нийтийн анхаарлыг ихээхэн татсан юм. Тодруулбал, "Монгол Улсын Ерөнхийлөгч асан Ц.Элбэгдорж Эрдэнэсийн сангийн Захирал бэртэйгээ нийлээд тус санг хохироосон" хэмээн дурдсан байдаг.

Энэ тухай тэрээр хэлэхдээ, "Монгол Улсын Эрдэнэсийн сангийн 2018 оны төсвийн гүйцэтгэл, Монгол Улсын Эрдэнэсийн сангийн үндсэн сангийн орлого, үндсэн болон гүйлгээ сангийн зарлагын 2019 оны төсвийн тухай Улсын Их Хурлын тогтоолын төслийг хаалттай горимоор хэлэлцэхээр оруулж ирсэн. Тэгэхээр энэ асуудлыг холбогдох хууль тогтоомжид нь өөрчлөлт оруулаад төрийн нууцаас гаргахгүй бол маш нууцын зэрэглэлтэйгээр цаашдаа хаалттай хэлэлцэхийг буруу гэж бодож байна. Үндсэндээ нууц байдгийн зорилго нь хадгалж, хамгаалах үзэл баримтлалтай. Гэвч одоо нууж байгаад хулгайлдаг болсон. Эрдэнэсийн сангийн хэлэлцэх асуудалд нуугаад байх зүйл байхгүй. Ер нь бол Монгол Улсын Эрдэнэсийн сан байхгүй шахуу болсон. Нууц гэдэг нэрээр материалыг нь дэлгэж болдоггүй. Монгол Улсын Ерөнхийлөгч асан Ц.Элбэгдорж гуай хүртэл Эрдэнэсийн сангийн Захирал бэртэйгээ нийлээд тус санг хохироосныг би Ажлын хэсгийн дүгнэлттэйгээр тогтоогоод гаргаад ирсэн. Энд хохирлын хэмжээ нь ч тодорхой байгаа" гэсэн байдаг.

Бүр тодруулбал Монгол Улсын Ерөнхийлөгч асан Ц.Элбэгдоржийн бэр П.Эрдэнэтуяа нь Монголбанкны дэргэдэх Эрдэнэсийн сангийн захирлаар ажилладаг. Тэрээр Ерөнхийлөгч асан Ц.Элбэгдоржийн гэргий Х.Болормаагийн төрсөн дүү болох Х.Болдбаатарын эхнэр юм.

УИХ-ын гишүүн Т.Аюурсайханыг дээрх мэдэгдлийг хийсний дараа П.Эрдэнэтуяа захирал зарим хэвлэлүүдэд "Т.Аюурсайхан гишүүний хэлсэн үгс ор үндэсгүй гүтгэлэг, худал мэдээлэл. Сүүлийн хоёр жилд Эрдэнэсийн сангаас сэтэрхий тэвнэ ч дутаагүй. Хүний нэр цохон, худлаа мэдээлэл түгээж байна. Бид мэдээлэл өгөхгүй, хянуулахгүй гэсэн зүйл огт байхгүй" хэмээн ярьсан байдаг.

П.Эрдэнэтуяагийн хувьд 2012 оноос Монголбанканд, 2017 оны нэгдүгээр сараас тус банкны дэргэдэх Эрдэнэсийн сангийн захирлаар ажиллаж байгаа юм.

Бид эл асуудалтай холбогдуулан УИХ-ын гишүүн Т.Аюурсайхантай холбогдож дараах асуултад хариулт авлаа.

-Та УИХ-ын чуулганы нэгдсэн хуралдааны үеэр Монгол Улсын Ерөнхийлөгч асан Ц.Элбэгдорж Эрдэнэсийн сангийн Захирал бэртэйгээ нийлээд тус санг хохироосныг ажлын хэсгийн дүгнэлттэйгээр тогтоогоод гаргаад ирсэн тухай ярьсан. Энэ тухай бидэнд дэлгэрэнгүй мэдээлэл өгөхгүй юу?

-Өнгөрөгч дөрөвдүгээр сарын 30-нд АТГ-ын дарга, дэд даргын томилгоотой холбогдуулан нээлттэй хэлэлцүүлэг зохион байгуулсан. Энэ үеэр тодорхой дурдсан. Мөн Капитал банк татан буугдсантай холбогдуулан иргэний танхимд зохион байгуулагдсан хэлэлцүүлгийн үеэр би Монгол банкны тэргүүн, дэд ерөнхийлөгч, Хяналт шалгалтын газрын дарга, Эрх зүйн газрын дарга, Капитал банкин дээрх эрх хүлээн авагч зэрэг албаны хүмүүс сууж байхад энэ тухай ярьж, тодорхой мэдээлэл өгч байсан. Дөрөвдүгээр сарын 26-нд ажлын хэсгийн дүгнэлтийг УЕП-т явуулсан. Учир нь Эрдэнэсийн сангийн хэд хэдэн зүйл маш нууцын зэрэгт хамаардаг. Бусад нээлттэй хэсгийг нь би олон нийтэд танилцуулсан. Хохирлыг Монгол банкнаас нөөц сан байгуулан дарж, түүнийгээ балансаас гадуур бүртгэсэн байсан. Үүнийг нь олж тогтоон баримтжуулж дүгнэлтдээ оруулсан. Эрдэнэсийн сангийн байршил, эд зүйл, төсөв мөнгөтэй холбоотой асуудал маш нууц байдаг учир илүү дэлгэрэнгүй зүйл ярьж, тайлбар хийх боломжгүй болчихоод байгаа.

-Хэзээ, хэрхэн хийсэн шалгалтаар хэдий хэмжээний хохирол учруулсан нь тогтоогдсон бэ?

-2017 онд УИХ-аас ажлын хэсэг байгуулан, Монголбанкны 2012-2016 оны үйл ажиллагааг шалгаж, тогтоол гаргасан. Хуулийн байгууллага зөрчлийг шалгаж байгаа байх. Улсын нууц гээд материалыг нь дэлгэж болохгүй байна.

-Эрдэнэсийн сангийн хөрөнгийг нууцаас гаргах хуулийн төсөл санаачлах гэж байгаа гэдэг мэдээлэл бий?

-Эрдэнэсийн сангийн захирал П.Эрдэнэтуяа тус санд ямар ч хохирол учраагүй гэдэг мэдээлэл хийж хаацайлж, олон нийтийг төөрөгдүүлж байгаа. Тус сангийн байршил маш нууц байж болно. Гэхдээ доторх эд зүйлс болоод төсөв мөнгөний асуудлыг нууцлах огт шаардлагагүй гэж үзээд хуулийн төсөл санаачлах гэж байгаа. Байршлаас бусдыг нь маш нууцаас гаргах хуулийн төсөл юм. Гэхдээ хуулийн байгууллагууд ажлаа хийх байлгүй дээ. Нууж байгаад хамгаалах, хадгалах биш нууж байгаад хулгайлдаг, алдагдаад буй учраас энэ асуудлыг улсын нууцаас гаргаж, олон нийтийн хяналтад оруулах хэрэгтэй.