Аюулгүй байдал, гадаад бодлогын байнгын хороо хаалттай хуралдлаа. Манай дипломатууд 70 кг героиныг Чех улсаар Герман улсын хилээр нэвтрэхдээ тээвэрлэж явсан нь баригдаж, шалгагдаж байгаа билээ. Үүнтэй холбогдуулан тус байнгын хорооны хуралдаанд 1992 оны Үндсэн хууль дагаж мөрдөгдөж эхэлснээс хойших хугацаанд Монгол Улсын Дипломат төлөөлөгчийн газрууд, тэдгээрийн ажилтнууд нэр холбогдсон хар тамхи болон бусад хэрэг зөрчлийн талаар ГХ-ны сайд Д.Цогтбаатар дээрх асуудлаар мэдээлэл хийсэн юм.

Энэ асуудлаар хуралдааны дараа Л.Болд гишүүн байр сууриа илэрхийллээ. Тэрбээр “Монгол дипломатч хар тамхины хэрэгт холбогдсон гэх мэдээлэл дэлхий дахинд ил болчихсон, Монгол Улсын нэр хүнд шалаар нэг уначихсан энэ тохиолдолд Монгол Улс нэр төрөө аврах хэрэгтэй. Яаж вэ гэхээр Монголын төр үүний цаана байхгүй гэдгээ нотлох ёстой. Хаалттай хаалганы цаана хуралдаад толгойг нь илэх гэж оролдох юм бол Монгол Улс, Монголын төр өөрөө хар тамхины наймааг өөгшүүлдэг төр болж хувирч байна.

Намайг гадаад харилцааны сайд болж очихоос өмнө дипломатууд тамхины наймаанд холбогдож байна гэсэн мэдээллүүд байсан. Бидний үед хатуу хариуцлага тооцдог байсан. Гэтэл сүүлийн жилүүдэд манан, мафи гэдэг нь гадна талдаа хар тамхины наймаагаа дэлгэж байна. Дээд тушаалын дипломатууд хар тамхины, олон улсын сүлжээний түвшний гэмт хэргийн сүлжээнд холбогдсоноо баталлаа. Монголын төр нэрээ цэвэрлэж, яаралтай хариуцлага ярих хэрэгтэй. Энэ хүмүүсийг тодорхойлж, томилуулсан хүмүүсийг яаралтай ил болгож мэдээлэх шаардлагатай. Тиймээс ил тод, чуулганы хуралдаан дээр ярь гэж хэлж байгаа юм” гэлээ.