ОХИДОО ХААНА НУУХ ВЭ? хэмээн ярьж, бичсээр байгаа ч бэлгийн мөлжлөгт автаж, хүчирхийлэлд өртсөн хүүхдийн тэр дундаа бага насны охидын тоо буурахгүй байна. Аав, ээждээ эрхэлж, энгэрт нь тэврүүлж байх ёстой бяцхан үрс насан туршдаа сэтгэлдээ хар толботой, бараан дурсамжтай үлдэх нь. 2019 оныг Хүүхдийн эрх, хамгааллын жил болгон, зарласан. Гэвч энэ тал дээр дорвитой санал, санаачилга гаргаж, хийж хэрэгжүүлж байгаа төсөл хөтөлбөр, санаа зовниж, сэтгэл тавьж буй төрийн түшээд гэж алга.

Хүүхдийн эрх, хамгааллын чиглэлээр үйл ажиллагаа явуулдаг төрийн бус байгууллагууд урд хормойгоороо хойд хормойгоо нөхөж, ёстой л бор зүрхээрээ ажиллаж байна гэхэд хилсдэхгүй. Алдаа, оноотой зүйл байдаг л байх. Эдгээр газруудын нэг бол бага насны бэлгийн хүчирхийлэлд өртсөн охидыг нөхөн сэргээх “Үжин” төв. Тус төв байгуулагдаад жилийнхээ ойтой золгож байгаа ч бэлгийн хүчирхийлэлд өртөж хохирсон олон охидыг цогц үйлчилгээгээрээ дамжуулан сэтгэл засал, бие махбодь цаашдын нийгмийн харилцаанд ороход эмчилж байна.

“Үжин төв” нь хүүхдийн эрх, хамгаалал төвийн дэргэдэх бага насны бэлгийн хүчирхийлэлд өртсөн охидын төв юм. Хүүхдийн эрх, хамгаалах төв 2009 онд байгуулагдсан цагаасаа бэлгийн хүчирхийлэлд өртсөн охидод нийгмийн болон сэтгэл зүйн үйлчилгээ үзүүлж ажилласаар иржээ. Энэ хугацаанд нэг зүйл дутагдаж байсан нь бэлгийн хүчирхийлэлд өртсөн охидыг нөхөн сэргээх цогц төв зайлшгүй хэрэгтэйг маш олон жил ярьсаар ирсэн ч ажил хэрэг болоогүй байна. Бэлгийн хүчирхийлэлд өртсөн амьдралын боломж тааруу хүүхдүүдэд өмгөөлөгч олдоггүй, сэтгэл зүйн эмгэгтэй болдог зэрэг олон асуудал тулгардаг. Тиймээс тэдэнд зориулсан цогц үйлчилгээ зайлшгүй шаардлага бий болжээ. Ингээд 2018 онд хүүхэд хамгааллын хариу үйлчилгээ үзүүлдэг Төрийн бус байгууллагуудыг ЗГ-ын хэрэгжүүлэгч агентлаг Гэр бүл, хүүхэд,залуучуудын хөгжлийн газар магадлан итгэмжлээд , наймдугаар сард нь бэлгийн эрх чөлөөгөө алдсан бага насны охидод үйлчилгээ үзүүлэх төвийн тендер зарлагдсанаар “Үжин” төв шалгарч арваннэгдүгээр сарын 1-н буюу “Үндэсний өгөх өдөр”-өөр нээлтээ хийж, анхныхаа хүүхдийг авсан байна. Одоогийн байдлаар тус төв бэлгийн хүчирхийлэлд өртсөн хүүхдүүдэд 12 төрлийн цогц үйлчилгээг үзүүлж байна.

Бид “Үжин” төвийн үйл ажиллагаа болон хүүхэд хамгаалалтай холбоотой бусад асуудлаар тус төвийн захирал Д.Ундраагаас дараах тодруулгыг авлаа.