Алтанбулаг боомтыг шинэчлэх бүтээн байгуулалтын ажил эхлэхээр болжээ. Боомтын шинэчлэлийн бүтээн байгуулалт хоёр үе шаттай явагдах бөгөөд эхний ээлжинд тусгаарлах зурвас бүхий дөрвөн эгнээ 1.7 км урттай авто зам, авто зогсоол барьж байгуулах ажлыг энэ сарын 26-наас эхлүүлэхээр болсон байна. Шинэчлэлийн хүрээнд Азийн хөгжлийн банкны 13.6 сая ам.долларын хөнгөлөлттэй зээлийн хөрөнгөөр зорчигч тээврийн 19, ачаа тээврийн 18, дэд бүтцийн таван барилга, иж бүрэн инженерийн шугам сүлжээ, 6000 ам.метр ногоон байгууламж, тусгаарлах зурвас бүхий дөрвөн эгнээ 1.7 км урттай авто зам, 7.000 м.кв авто зогсоол, 30000 м.кв зам талбай барих юм байна.

Улсын төсвийн хөрөнгөөр шуурхай удирдлагын төвтэй холбогдсон орчин үеийн теле хяналтын систем бүхий тээврийн хэрэгслийг автоматаар бүртгэх ухаалаг гарцууд болон өндөр хүчин чадлын рентген, тоног төхөөрөмжүүд суурилагдах талаар Сангийн яамнаас мэдээлэв. Алтанбулаг боомт нь нийт зорчигчийн 14.5 хувь, тээврийн хэрэгслийн 16 хувь нэвтэрдэг боомт боловч барилга байгууламж, дэд бүтэц нь өсөн нэмэгдэж буй хэрэгцээ шаардлагыг хангахгүй, ачааллаа дийлэхгүйгээс зорчигч, ачаа тээвэр хилээр нэвтрэхэд олон төрлийн хүндрэл гардаг тухай албаныхан хэлж байна.

Шинэчлэлийн үр дүнд Алтанбулаг боомтоор өдөрт нэвтрэх зорчигчийн тоо 3 дахин, ачааны болон суудлын тээврийн хэрэгслийн тоо тус бүр 4 дахин нэмэгдэнэ гэж тооцоолжээ. Боомтын шинэчлэлийн хоёр дахь үе шат болох боомтын барилга байгууламжийн өргөтгөл шинэчлэл, инженерийн шугам сүлжээ барьж байгуулах ажлыг 2020 оны эхний улиралд эхлүүлж, боомтын шинэчлэл 2021 онд бүрэн хийгдэж дуусахаар төлөвлөжээ.