Ерөнхийлөгчийн Тамгын газрын дарга З.Энхболд ийн ярилаа. “2017 оны есдүгээр сард манай улсад 40 зөвлөмж өгсөн. Энэ 40 зөвлөмжийг биелүүлэх хэрэгтэй. Үүнийг биелүүлэх юм бол саарал жагсаалт гэдэг зүйл байхгүй гэж хэлсэн. Гэтэл дөрвөн зөвлөмж биелүүлээгүй байна. Танай хуулийн байгууллага мөнгө угаах гэмт хэргийг шийдэхгүй байна гэдгийг гадны хуулийн байгууллага хэлж байна. Шийдэхгүй байгаа нь үнэн. С.Баярын арван байшингийн асуудлыг одоо болтол шийдээгүй байгаа. С.Баярцогтын оффшорын нэг сая ам.доллар дараа нь 10 сая болсон. Ийм тодорхой хэргийг гадаадын хуулийн байгууллагаас манайд бичиг өгсөн. Америкийн Хууль зүйн яам “Арван байшинг авлигаар авсан гэдгийг нотлоод шүүхийн шийдвэрээ явуулчихвал танай улсын өмч болно” гэсэн. Харин Швейцар Монголын шүүхийн шийдвэр хаана байна гээд байгаа.

Ийм хэргүүдийг шийдэхгүй байгаа учраас танай улс мөнгө угаах гэмт хэрэгтэй тэмцэхгүй байна гэж дүгнэж байна. Мөнгө угаах гэмт хэргийг манай хуулийн байгууллага сүүлийн 30 жилийн хугацаанд шийдээгүй. Шүүгч нарын дунд авлига авдаг олон шүүгч байна. Эхний 17 шүүгчийг түдгэлзүүлсэн. Одоо шүүх хурал нь болох гэж байна. Ерөнхий прокурор ажлаа хийхгүй байсан. Ерөнхий прокурорыг солиод хэдэн сар болж байна. Гэвч АТГ, цагдаа мөрдөн байцаалтаа явуулахгүй бол бас болохгүй. Хуулийн байгууллага гурван шатлалтай байгаа. Аль нэг нь ажиллахгүй бол ажил явахгүй.

Мөнгө угаах гэмт хэрэгтэй тэмцдэггүй хуулийн байгууллагын систем зөвхөн шүүгч прокурорууд ч биш. Цагдаа болон АТГ-ын ажил хийдэггүй хүмүүсээ сольж, мөнгө угаасан гэмт хэргийг шийдэж, улсын орлого болгохгүй бол саарал жагсаалтад ахиад орно. Монгол банк болон Санхүүгийн зохицуулах хорооны дарга ажлаа хийсэнгүй. Хууль зүйн сайд болон Сангийн сайд нар ажлаа хийсэнгүй. 40 зөвлөмж дөрвөн байгууллагын дунд байгаа. Монголчуудын бүх кредит карт блоклогдож, компаниудын экспорт зогсоод ирэхээр гамшиг болох гээд байна. Ийм зүйл болгохгүйн тулд энэ дөрвөн байгууллага хариуцна. Өөр хэн ч хариуцахгүй” гэсэн юм.