УИХ-ын гишүүн Т.Аюурсайхан: Оюутолгойн Гэрээ байгуулснаас хойш УИХ анх удаа шийдвэр гаргах гэж байна. Ямар ч байсан Монголын эрх ашигт нийцүүлж энэ ордыг цаашид ашиглах хэрэгтэй. 2009 онд анх гэрээ байгуулаад, Дубайн гэрээ байгуулаад С.Баяр, Ч.Сайханбилэгийг хуулийн байгууллага шалгаад гэм бурууг тогтоож, яллах дүгнэлт үйлдэж шүүхэд шилжүүлсэн. Оюутолгой гэрээ Монголд хохиролтой болсон гэдгийг бүгд хүлээн зөвшөөрч байгаа. Энэ асуудлыг С. Баяр Засгийн газар мэдлэг мэдээлэлгүй байсан гэж байсан. Засгийн газар мэдлэг мэдээлэлтэй байх үүрэгтэй. Гэрээ Монголд хохиролтой болсныг хүн бүр хүлээн зөвшөөрч байна. АТГ-ын дүгнэлтэд ч, УИХ-ын Ажлын хэсгийн дүгнэлтэд ч Дубайн гэрээ олон улсын гэрээ хэлцэл биш гэж дүгнэсэн. Монгол Улс 34 хувийг үнэгүй эзэмших ёстой байсныг Ашигт малтмалын хуульд өөрчлөлт оруулж, үнэтэй эзэмшсэний төлөө 1.4 тэрбум долларын өртэй болоод байна. 6.2 тэрбум долларын ашгийг Рио Тинто авсан байхад Монгол Улс 0 төгрөг авсан байна. Одоо гэрээг өөрчлөхгүй бол бид хэзээ ч ногдол ашиг авахгүй. Байгалийн давагдашгүй хүчин зүйл болсон тохиолдолд л хөрөнгө оруулалтыг нэмэгдүүлэхээр гэрээ байгуулсан ч 6 тэрбум доллароор хөрөнгө оруулалтаа нэмээд 11.1 тэрбум долларт хүргээд байна. Тогтоолын дагуу Ажлын хэсэг байгуулагдах байх. Л.Оюун-Эрдэнэ сайд ахлах байх. Энэ хүнээс бусад хүн Оюутолгой компанийнхан уулзахыг хориглож, Монгол Улс нэг цонхоор ажиллах ёстой.