Өнөөдөр 2020 оны дөрөвдүгээр сарын 2. Улсын Онцгой комиссын шийдвэрээр БНСУ, Японд байгаа монгол иргэдээ авчрах тусгай үүргийн нислэг гүйцэтгэх өдөр. Сөүл рүү нисэх тусгай үүргийн онгоц өнөөдөр 08.40 цагт Улаанбаатараас хөөрч, 12.50 цагт Сөүлд газардана. Ингээд 14.20 цагт Сөүлээс Улаанбаатар руу нисч, 17.00 цагт Чингис хаан нисэх онгоцны буудалд газардах хуваарьтай. Харин маргааш нислэг үйлдэх байсан Токиогийн нислэг нэг хоногоор урагшлж мөн л өнөөдрийн 13.00 цагт Улаанбаатараас хөөрч, орон нутгийн цагаар Токиод 19.00 цагт газардаад тэндээ нэг хоноод дөрөвдүгээр сарын 3-нд 08.30 цагт Токио хотоос хөөрч, Улаанбаатар орон нутгийн цагаар 13.05 цагт газардахаар болсон. Энэ бүхнийг сануулахын учир гэвэл экс Ерөнхийлөгч Ц.Элбэгдорж БНСУ-аас тусгай үүргийн нислэгээр ирэх иргэдийн нэрсийн жагсаалтад багтсан гэнэ. Хэрвээ үнэхээр нэр нь ороод, өөрөө багтаад эх орондоо ирвэл бусдын жишгээр шууд 21 хонгийн тусгаарлалтад орох ёстой. Гэтэл түүнийг нисэх онгоцны буудал дээрээс шууд саатуулж, Төв аймгийн Цагдан хорих төвд тусгаарлан шалгах шийдвэр гарсан талаар өчигдөр зарим хэвлэл мэдээллийн хэрэгслээр “албаны эх сурвалж онцоллоо” гэсэн зүүлттэйгээр шуугиад өнгөрөв. Үнэхээр Ц.Элбэгдорж өөрөө хүрээд ирж гэмээнэ дэлхийг айдаст авхуулж байгаа коронавирусээс амь тавин зугатав уу, гэгээрч сэхээрээд гэм буруугаа шалгуулахаар ирэв үү гэх мэт олон асуултын хариулт тодорхой болох биз. Ерөнхийлөгч асан Ц.Элбэгдорж 2019 оны аравдугаар сарын 7-нд Монгол Улсын хилээр гарч одсоноос түүнийг олон удаа эх орон нь дуудсан.

Баримт 1. Өнгөрөгч хоёрдугаар сарын 26-нд цацагдсан нэвтрүүлгийн үеэр “Та эх орондоо очих уу ” гэсэн сэтгүүлчийн асуултад “Би эх орондоо очно гэж бодож байсан. Очно гэж хэлээд л байгаа. Гэхдээ яг Х.Баттулгын урилгаар очих нь зөв үү. Тэр хүн хуулийн байгууллагынхныг өдөр ч ажлыг нь хийлгэхгүй, шөнө ч унтуулахгүй байгаа. Тэгэхээр би хуулийнхны дуудлагаар очих уу. Х.Баттулгын зохиох жүжгийн дүр болж, бойны ямаа шиг хашаа руу орох уу гэдгээс сонгох хэрэгтэй болчихоод байна” гэсэн хариулт өгч, ингэснээрээ “Би орондоо очихгүй” гэдгээ тодорхой илэрхийлж байв.

Баримт1. 2020.03.02 “МАНАН дэглэмийн эсрэг Монгол түмний нэгдэл”-ээс Нийслэлийн Прокурорын газарт шаардлага хүргүүлсэн

Тус шаардлагад:

Монгол Улсын Ерөнхийлөгч асан Ц.Элбэгдорж, таслан сэргийлэх яаралтай арга хэмжээ авах, Ерөнхий сайд асан Ч.Сайханбилэгт авсан таслан сэргийлэх ажиллагааны шүүхийн шийдвэрийн хуулбарыг өгнө үү.

Мөн нэгдүгээр сарын 10-нд гарсан Ч.Сайханбилэгийг хилээр нэвтрэхэд таслан сэргийлж баривчлах тухай тогтоолын хуулбарыг өгнө үү гэжээ.

МАНАН дэглэмийн эсрэг Монгол түмний нэгдэл”-ээс “Тэднийг Олон улсын түвшинд интерполоор эрэн сурвалжилж байгаа нь Монгол Улсын нэр хүндийг гутааж байна. Бид Гадаад хэргийн яаманд хандан тэдний дипломат паспортыг нь хүчингүй болгож, тус хоёр иргэнийг нэн яаралтай Монгол Улсад ирүүлэх тал дээр ажиллана” гэдгээ яг нэг сарын өмнө мэдэгдэж байлаа.

Баримт 3. Хамгийн сүүлд Засгийн газрын Хэрэг эрхлэх газрын дарга Л.Оюун-Эрдэнэ сэтгүүлчдэд мэдээлэл өгөх үеэрээ “Ц.Элбэгдоржийн найзууд нийлж "Нэгдмэл найзуудын холбоо" гэж байгуулаад оффшор бүсээс мөнгө угаасан нь нотлогдсон. Үүнээс болж тэр эх орондоо ирэхгүй байна. Гутлаа тослоод, зангиагаа зүүгээд ирнэ гээд байсан хаана байна. Одоо ирээд хуулийнхаа өмнө шалгуулах хэрэгтэй. Монгол Улсын төрийн нууцыг тээгээд явж байгаа Монгол Улсын Ерөнхийлөгч, Ерөнхий сайд байсан хүмүүс нь гаднын нутагт байгаад байж болохгүй. Ямар удаан хуралд суудаг юм бэ. Four seasons гээд таван одтой зочид буудалд амьдраад зургаан сар болж байна” хэмээн мэдээлж байсан удаатай.

Сүүлд нь тэрбээр өөрийн албан ёсны твиттер хаягтаа “Нэн шаардлагатай иргэдээ авчирна гэж УОК-оос мэдэгджээ. “Нэн шаардлагатай иргэд” гэдэгт миний бие багтана гэж итгэе. Зарим хурал уулзалт цуцлагдаж, хойшилж бас ажил цэгцэрч байна. Вирусын тархалт ихтэй газраас холдоод, өөрийгөө карантилж хугацаа тоолоод, нутаг руугаа ойртож явна” хэмээн бичсэн байсан юм. Энэ удаа ээлжит хошгоруулалт нь байж уу, үгүй юү гэдэг нь өнөөдөр тодорххой болох нь.