БОАЖЯ-аас цаг үеийн асуудлаар мэдээлэл хийв. Хэвлэлийн хуралд Байгалийн нөөцийн бодлого, зохицуулалтын газрын дарга Ц.Уранчимэг, Тусгай хамгаалалттай газар нутгийн бодлого зохицуулалтын газрын дарга Н.Баатарцогт, Ойн газрын дарга Б.Оюунсанаа, Усны газрын дарга З.Батбаяр, УЦОШГ-ын Ахлах мэргэжилтэн О.Оюунчимэг нар оролцлоо.

Засгийн газрын хэрэгжүүлэгч агентлаг Усны газар, Туул голын сав газрын захиргаад хамтран Улаанбаатар хотод ажиллаж байгаа машин угаалгын газруудын үйл ажиллагаатай энэ сард танилцжээ. Улаанбаатар хотод 200 орчим авто машин угаалгын газар үйл ажиллагаа явуулж байна. Үүнээс 65 орчим хувь нь төвлөрсөн шугамаас, 25 хувь нь гүний худгаас, 10 орчим хувь нь зөөврөөр усаа авч ашигладаг аж.

Нийт угаалгын газрын 30 орчим хувь нь саарал усаа эргүүлэн ашиглах боломжийг бүрдүүлсэн байна. Улаанбаатар хотын авто угаалгын газрууд бүгд саарал усаа эргүүлж ашиглах нь зүйтэй талаар мэдээлэлтэй байгаагаас гадна хаягдал усаа эргүүлэн ашиглаж эхэлжээ. Мөн автомат төхөөрөмж суурилуулах нь машин угаалгах үнэ буурах, усаа хэмнэх, эргүүлэн ашиглах давуу талтайг хяналт, шалгалтаар дүгнэсэн байна.