Үндсэн хуулийн үзэл санаа ард түмний хүсэл зоригийн илэрхийлэл, төр ард түмний хоорондох гэрээ гэгддэг. Гэтэл Монголын нийгэм жил ирэх тутам эцэг хуулиа үл дээдлэн юм л бол гар хөлөө дүрж өөрчилдөг байдлыг хүлцэх зам руу оруулж байна. Товчхондоо эрх баригчид ард түмэнтэй байгуулсан мөнхийн гэрээгээ зөрчиж гэмт хэрэг үйлддэг.

Олон хямралыг гэтлэх бололцоот аргуудын нэг нь төрд олон жил ажилласан өндөр дээд албан тушаал хашигчдын хөрөнгийг хууль ёсных эсэхийг шалгаж хэрвээ хулгайн замаар хөлжигчид байваас тэдний хөрөнгийг улсын орлого болгон хурааж улсын төсөвт төвлөрүүлэн эргээд эрүүл зах зээлийн системд зөв голрилооор, үйлдвэржилт бүтээн байгуулалт руу хөрөнгө оруулдаг оновчтой шийдлүүдийг хэрэгжүүлэх зарим туршлагыг Монгол Улс нэвтрүүлэх шаардлага байна.

Өөрөөр хэлбэл эдийн засгийн аюулгүй байдал нэгэнт алдагдаж тэр ч бүү хэл хөрөнгө оруулалт гэх ойлголтыг тусгаар тогтнолыг худалдах хэмжээнд ойртуулна гэдэг аюулын харанга. Улс төрчдийн увайгүй тохиролцоо, олон жилийн хулгайн мөнгөнд суурилсан сонгуулийн будилаан ийм байдалд хүргэсэн нь гашуун үнэн.

1991 оноос өдий хүртэл зах зээлийг зөв бодлогоор зохицуулах бололцоо гарсангүй. Улс оронд эзэнгүй юм шиг авирлацгаах шударга бус түшмэдийн үер цутгацгаан тэд дэлхийд зартай оффшор данстнууд болтлоо улайрчээ. Иймд тодорхой нэг үеийнхэн, улс төрчид уриалж хууль бус хөрөнгийг цэгцлэх л үлдлээ.