“Содон стандарт” цогцолбор хорооллын оршин суугчдын төлөөлөл эрүүл, аюулгүй амьдрах эрх нь зөрчигдөж байна гэх асуудлаар өнөөдөр /2024.04.22/ мэдээлэл өглөө. Тодруулбал, тус хорооллын зүүн хойд талын баруунаас зүүн чиглэлд зорчих замын өргөтгөлийн ажлын улмаас оршин суугчид хохирч байна гэв. Тэд зам өргөтгөх ажлыг эсэргүүцээгүй, гэхдээ оршин суугчдын ашигладаг орон сууцны эргэн тойрон дахь зам талбайг өргөтгөлийн ажилд оруулж байгаад эсэргүүцлээ илэрхийлж байгаа аж.

Учир нь тус орон сууцны гадна талбайд бүртгэлтэй 1000 машины зогсоол байдаг ч ААН, оршин суугчдын гээд 2000 гаруй машин байршдаг. Орон сууц руу орж, гарах гурван гол хаалга байдаг.

Гэвч зам өргөтгөлийн ажлын улмаас зүүн, хойд орцууд хаагдах болоод байгаа бөгөөд ганц баруун талын төв хаалгаар тэр олон машин орж, гарахад хүндрэлтэй болох аж. Муугаар бодоход гал команд, түргэний машин ч яаралтай үед нэвтрэх боломжгүй болох эрсдэлтэй байна гэсэн юм.