Монгол Улсын Төрийн соёрхолт инженер Н.Нацагням Азийн Бүтээмжийн байгууллагын "Үндэсний бүтээмжийн шагнал-2015" шагнал хүртлээ. Энэхүү шагналыг олон улсын бүтээмжийг нэмэгдүүлэхэд оруулсан түүний хувь нэмрийг үнэлэн олгосныг БСШУ-ы дэд сайд Я.Төмөрбаатар гардуулан өгөв.

Энэ үеэр "Энэ шагнал бол монголчуудын хувьд асар үнэтэй. Азийн бүтээмжийн байгууллагаас 5 жил тутамд олгодог шагнал.Монголын бүтээмжийн төв нь тус байгууллагын гишүүнчлэлтэй. Яамны зүгээс Үндэсний бүтээмжийн төвтэй хамтран ажиллах санамж бичиг байгуулаад ажиллаж байна. Цаашид үндэсний бүтээмжийн эрхзүйн орчныг бий болгох, боловсон хүчнийг сургаж бэхжүүлэх, нийгмийн сэтгэлзүйг энэ чиглэлд бэлтгэхэд олон ажил хийх болно. Н.Нацагнямдаа цаашдынх нь ажилд амжилт хүсч, инженерүүдээ манлайлан, эх орондоо ихийг хийж бүтээнэ гэдэгт нь итгэж байна” гэв.

Мөн энэ үеэр Н.Нацагнямд Монгол Улсын Засгийн газрын шагнал “Шилдэг зохион бүтээгч” цол тэмдгийг гавьяат хуульч Н.Чинбат гардуулав. Шагнал гардуулах ёслолд тус сургуулийн эрдэмтэн багш, доктор, оюутнууд оролцлоо.

Э.ЭНХ-ЭРДЭНЭ