Зураг: Нэр дэвшигч Ш.Хаан

Налайхын захирагчийн сонгуулийн нэгдсэн дүн гарч нэр дэвшигч Д.Батбаатарт 1744 сонгогч буюу 16.7 хувь нь, Б.Баяндэлгэрт 969 сонгогч буюу 9.32 хувь нь, Г.Болдбаатарт 304 сонгогч буюу 2.92 хувь нь, Д.Ганболдод 458 сонгогч буюу 4.4 хувь нь, Н.Мандуулд 550 сонгогч буюу 5.29 хувь нь, Ц.Минжинхүүд 2121 сонгогч буюу 20.39 хувь нь, Ш.Хаанд 3215 сонгогч буюу 30.91 хувь нь, Д.Цогоод 1039 сонгогч буюу 9.99 хувь нь саналаа өгсөн.

Гэсэн ч 1994 онд батлагдсан Хот, тосгоны эрх зүйн байдлын тухай хуулиар нэр дэвшигч санал өгсөн нийт сонгогчдын 50-иас дээш хувийн саналыг авснаар ялалт байгуулсанд тооцох ёстой гэж заасан байдаг. Энэхүү болзолыг хангаж санал өгсөн сонгогчдын 50-иас дээш хувийн дэмжлэгийг авсан нэр дэвшигч байхгүй учраас сонгуулийг дахин явуулахаар болсон тухай сонгуулийн Нэгдсэн штабаас мэдээлэв.

Ингэхдээ хамгийн их санал авсан хоёр нэр дэвшигчийг дахин сонгуульд оролцуулах юм байна. Сонгуулийн нэгдсэн дүнгээр Ш.Хаанд нийт сонгогчдын 30.91 хувь нь, Ц.Минжинхүүд 20.39 хувь буюу сонгогчдын олонх нь саналаа өгсөн. Сонгуулийн нэгдсэн дүнг ажлын хэсгийнхэн нийслэлийн Иргэдийн төлөөлөгчдийн хуралд танилцуулж, саналын тоогоороо бусдыг тэргүүлж байгаа Ш.Хаан, Ц.Минжинхүү нарын хооронд дахин санал хураалт явуулахаар төлөвлөсөн тухай танилцуулахаар явжээ. Сонгуулийн штабын зүгээр энэ долоо хоногтоо багтаан дахин санал хураалт явуулах хүсэлтэй байгаа гэнэ. Сонгуулийн зардлыг шийдээд өгчихвөл дахин санал хураалтаар Налайх хотын захирагч сонгогдох юм.